قازاق ەلى دەپورتاتسيالاعان رەسەي مايورى ميحايل جيلين 6.5 جىلعا سوتتالدى

2227
Adyrna.kz Telegram

موبيليزاتسيا جاريالانعاندا قازاق ەلىنە قاشقان رەسەي فەدەراتسيالىق كۇزەت قىزمەتىنىڭ (فسو) مايورى ميحايل جيلين "اسكەري قىزمەتتەن قاشتى", "شەكارانى زاڭسىز كەسىپ ءوتتى" دەگەن ايىپپەن 6,5 جىلعا سوتتالدى. ۇكىمدى بارناۋىل گارنيزونىنىڭ اسكەري سوتى شىعاردى. ول جازاسىن اسا قاتاڭ رەجيمدە وتەپ، بۇكىل اتاعىنان ايىرىلاتىن بولادى، دەپ حابارلايدى "ادىرنا" ۇلتتىق پورتالى.  

“اسكەري قىزمەتشى ارنايى اسكەري وپەراتسيا ايماعىنا بارۋدان قورىقتى. اسكەري بورىشىن وتەگىسى كەلمەي، جىلجىمايتىن مۇلكىن ساتىپ، باسشىلىققا جالعان مالىمدەمە جاسادى. ول كەيىن مۇگەدەك بولىپ، باقىلاۋ-وتكىزۋ پۋنكتىن زاڭسىز اينالىپ ءوتتى", –  دەلىنگەن حابارلامادا.

ميحايل جيلين رەسەي فەدەراتسياسى قىلمىستىق كودەكسىنىڭ 338-بابى، 1-بولىگى بويىنشا ايىپتى ەسەبىندە تانىلدى. اتاپ ايتقاندا، "دەزەرتيرلەۋ”، 322-بابىنىڭ 1-بولىگى - "رەسەي فەدەراتسياسىنىڭ مەملەكەتتىك شەكاراسىن زاڭسىز كەسىپ ءوتۋ" باپتارى بويىنشا كىنالى دەپ تانىلدى. ول قاتاڭ رەجيمدەگى كولونيادا 6 جىل 6 ايعا باس بوستاندىعىنان ايىرىلدى.

سوتتىڭ ءباسپاسوز قىزمەتى ۇكىم زاڭدى كۇشىنە ەنگەن جوق دەپ مالىمدەگەن.

"ازاتتىقتىڭ" جازۋىنشا، 36 جاستاعى جيلين بۇعان دەيىن رەسەيدىڭ فەدەراتسيالىق كۇزەت قىزمەتىنىڭ ءسىبىر فەدەراتسيالىق وكرۋگىندە جۇمىس ىستەپ، پرەزيدەنت ۆلاديمير ءپۋتيننىڭ ايماقپەن بايلانىسىنا جاۋاپ بەرگەن.

21 قىركۇيەكتە پۋتين رەسەيدە موبيليزاتسيا جاريالاعان كەزدە جيلين وتباسىن الىپ رەسەيدەن قاشقان. وعان رەسەيدەن كەتۋگە شەكتەۋ بولعاندىقتان، قازاقستان شەكاراسىن بۇزىپ وتكەن. 26 قىركۇيەكتە مايوردى اباي وبلىسى شەكاراشىلارى ۇستادى. 6 جەلتوقساندا جيلين ارمەنياعا ۇشا المادى. رەسەي ميحايل جيلينگە حالىقارالىق ىزدەۋ جاريالاپ، قازاقستان ايماعىندا ۇستالدى. ال جەلتوقساننىڭ اياعىندا قازاق ەلىنەن رەسەيگە ەكستراديتسيالادى.

"ادىرنا" ۇلتتىق پورتالى

پىكىرلەر