اباي وبلىسىندا كىتاپ وقۋ مادەنيەتىن دامىتۋعا باعىتتالعان ماڭىزدى شارا ءوتتى. اباي اتىنداعى وبلىستىق امبەباپ كىتاپحاناسىندا اباي وبلىسىنىڭ اكىمدىگى مەن «كىتاپ وقيتىن ۇلت – چيتايۋششايا ناتسيا» قوعامدىق قورى اراسىندا ىنتىماقتاستىق تۋرالى مەموراندۋمعا قول قويىلدى.
ءىس-شارا قازاقستان رەسپۋبليكاسى پرەزيدەنتىنىڭ وقۋ مادەنيەتىن دامىتۋ جانە زەردەلى ۇلت قالىپتاستىرۋ جونىندەگى باستامالارىن وڭىردە ىسكە اسىرۋ ماقساتىندا ۇيىمداستىرىلدى. وعان اباي وبلىسى اكىمىنىڭ ورىنباسارى مەيىرلان راحانوۆ، «كىتاپ وقيتىن ۇلت – چيتايۋششايا ناتسيا» قوعامدىق قورىنىڭ اتقارۋشى ديرەكتورى ايان ساكوشەۆ، زيالى قاۋىم وكىلدەرى مەن كىتاپحانا وقىرماندارى قاتىستى.
مەموراندۋم اياسىندا وڭىردە «كىتاپ وقيتىن ۇلت» رەسپۋبليكالىق جوباسى كەزەڭ-كەزەڭىمەن جۇزەگە اسىرىلادى. نەگىزگى ماقسات – كىتاپ وقۋ مادەنيەتىن كەڭىنەن ناسيحاتتاۋ، تۇرعىنداردىڭ كىتاپقا قىزىعۋشىلىعىن ارتتىرۋ، جاستاردىڭ ينتەللەكتۋالدىق الەۋەتىن دامىتۋ جانە كىتاپحانالاردىڭ قوعامدىق-مادەني ورتالىق رەتىندەگى ءرولىن كۇشەيتۋ.
وبلىس اكىمىنىڭ ورىنباسارى مەيىرلان راحانوۆ سەمەي ءوڭىرىنىڭ اعارتۋشىلىق داستۇرىنە توقتالىپ، بۇل جوبانىڭ وسكەلەڭ ۇرپاقتى كىتاپ وقۋعا باۋلۋدا ەرەكشە ماڭىزعا يە ەكەنىن اتاپ ءوتتى.
– سەمەي ءوڭىرى – تۇڭعىشتار مەكەنى. بۇل جوبا ارقىلى جاستاردىڭ كىتاپ وقۋعا دەگەن قىزىعۋشىلىعىن ارتتىرىپ، وقۋ مادەنيەتىن جاڭا دەڭگەيگە كوتەرەمىز. ءوڭىر باسشىلىعىنىڭ قولداۋىمەن اعارتۋشىلىق باعىتتاعى جۇمىستار الداعى ۋاقىتتا دا جالعاسادى، – دەدى ول.
جوبا قازاقستان رەسپۋبليكاسى پرەزيدەنتىنىڭ 2026 جىلعى 16 مامىرداعى «وقۋ مادەنيەتىن دامىتۋ جانە زەردەلى ۇلت قالىپتاستىرۋ جونىندەگى شارالار تۋرالى» جارلىعىن ىسكە اسىرۋدىڭ ماڭىزدى تەتىكتەرىنىڭ ءبىرى بولىپ سانالادى. ونىڭ باستى ماقساتى – قازاقستاندا تۇراقتى كىتاپ وقۋ مادەنيەتىن قالىپتاستىرىپ، ەلدىڭ الەمدەگى ەڭ كوپ كىتاپ وقيتىن مەملەكەتتەردىڭ قاتارىنا قوسىلۋىنا ۇلەس قوسۋ.
قوعامدىق قوردىڭ اتقارۋشى ديرەكتورى ايان ساكوشەۆ اباي وبلىسىنىڭ جوباعا قوسىلۋى باستامانىڭ رەسپۋبليكالىق اۋقىمىن كەڭەيتىپ، ءوڭىردىڭ كىتاپ وقۋ مادەنيەتىن دامىتۋعا دەگەن قىزىعۋشىلىعىن كورسەتەتىنىن ايتتى.
– ءبىزدىڭ ماقساتىمىز – كىتاپ وقۋدى ءار ءوڭىردىڭ ءبىلىم بەرۋ جانە قوعامدىق ءومىرىنىڭ ماڭىزدى بولىگىنە اينالدىرۋ. وسى باعىتتا تەحنولوگيالىق سەرىكتەسىمىز Yandex Qazaqstan كومپانياسىمەن جانە «ياندەكس كىتاپتار» سەرۆيسىمەن بىرلەسىپ جۇمىس ىستەپ كەلەمىز. ورتاق مىندەتىمىز – مەملەكەتتىك تىلدەگى كىتاپتاردىڭ تسيفرلىق قورىن كوبەيتىپ، ساپالى ادەبيەتتى ەلىمىزدىڭ ءاربىر تۇرعىنىنا قولجەتىمدى ەتۋ، – دەدى ايان ساكوشەۆ.
التى ايعا سوزىلاتىن رەسپۋبليكالىق كىتاپ وقۋ مارافونى بارىسىندا قاتىسۋشىلار ارنايى بەكىتىلگەن 15 كىتاپتى وقىپ، تەستىلەۋ مەن ينتەللەكتۋالدىق كۆيزدەرگە قاتىسادى. كىتاپتار تىزىمىنە وتباسىلىق قۇندىلىقتار، تاربيە، كوشباسشىلىق، جاۋاپكەرشىلىك جانە ۇلتتىق رۋحاني مۇرا تاقىرىپتارىنداعى شىعارمالار ەنگىزىلگەن.
الداعى ۋاقىتتا وڭىرلىك جوبا كەڭسەسى قۇرىلىپ، ءبىلىم بەرۋ جانە مادەنيەت ۇيىمدارىندا ۇيلەستىرۋشىلەر تاعايىندالادى. سونىمەن قاتار قاتىسۋشىلاردى تىركەۋگە جانە وقىلعان كىتاپتاردى ەسەپكە الۋعا ارنالعان تسيفرلىق پلاتفورما ىسكە قوسىلادى. جوباعا اۋىلدىق جانە شالعاي ەلدى مەكەن تۇرعىندارىن كەڭىنەن تارتۋعا ەرەكشە كوڭىل بولىنەدى.
جوبا اياسىندا «كىتاپ وقيتىن مەكتەپ»، «كىتاپ وقيتىن پەداگوگ»، «كىتاپ وقيتىن اۋلەت»، «كىتاپ وقيتىن ۋنيۆەرسيتەت»، «كىتاپ وقيتىن كوللەدج»، «كىتاپ وقيتىن مەملەكەتتىك قىزمەتشى» جانە «كىتاپ وقيتىن سپورتشى» باعىتتارى بويىنشا رەسپۋبليكالىق مارافون ۇيىمداستىرىلادى.
«كىتاپ وقيتىن ۇلت» باستاماسى مەملەكەتتىك ورگانداردى، ءبىلىم بەرۋ ۇيىمدارىن، تەحنولوگيالىق سەرىكتەستەردى جانە ازاماتتاردى ورتاق ماقساتقا – كىتاپ وقۋدى قازاقستاندىقتاردىڭ كۇندەلىكتى ءومىرىنىڭ اجىراماس بولىگىنە اينالدىرىپ، زەردەلى ۇلت قالىپتاستىرۋعا جۇمىلدىرۋدى كوزدەيدى.
