12 ماۋسىم كۇنى ەلىمىزدەگى بالا قۇقىقتارى جونىندەگى جاڭا ومبۋدسمەن بولىپ تاعايىندالعان دينارا زاكيەۆا سەمەيدەگى ورتتەن قازا تاپقان وتباسىلارداعى بالالارمەن كەزدەستى، دەپ جازادى "ادىرنا". بۇل تۋرالى ول ءوزىنىڭ الەۋمەتتىك جەلىدەگى پاراقشاسىندا جازدى.
جاڭا قىزمەت يەسىنىڭ ايتۋىنشا بالالارعا ءتيىستى كومەك كورسەتىلىپ، مەكتەپكە دەيىنگى بالالار بالاباقشاعا ورنالاستىرىلىپ، ولاردىڭ ارقايسىمەن اڭگىمە وربىگەن. پرەزيدەنت تاپسىرماسىنا سايكەس قايتىس بولعان قىزمەتكەرلەردىڭ بالالارىن وقىتۋ، الەۋمەتتىك قولداۋ، جاردەماقى جانە تاعى باسقا كولداۋ شارالارى ىسكە اسىرىلىپ جاتقانىن جازدى ول.
"2 بالا اناسىز قالسا، ال 7 بالا اكەسىز قالدى. وتە اۋىر. ەكەۋى ءالى مەكتەپكە دە بارماعان، 2 جانە 5 جاستا. التاۋى – مەكتەپ وقۋشىلارى. بىرەۋى - ۋنيۆەرسيتەت ستۋدەنتى.
بالالاردىڭ كوبى بورودۋليحينا، ۋسپەنكا، جەلەزەنكا اۋىلدارىندا تۇرادى.
كىشكەنتايلارى وسكەندە كىم بولعىسى كەلەتىندەرىن ايتتى. ءسال ۇلكەندەرى مەن جاسوسپىرىمدەر بولعان جاعدايدىڭ ءبارىن ءتۇسىنىپ تۇر، اكەلەرىمەن بىرگە وتكىزگەن ساتتەردى ەسكە الدى.
كەشكە مارقۇم مەيرامگۇلدىڭ سەمەيدەگى تۋىستارىنىڭ ۇيىندە تۇرىپ جاتقان 2 بالاسىمەن، اپكەسىمەن كەزدەستىك. وتە تاتۋ وتباسى ەكەن، ءبىر بىرىنە قولداۋ تانىتىپ، بالالارعا بارىنشا جىلۋلىق بەرىپ، قاستارىندا ءجۇر.
اپكەسىنىڭ ايتۋىنشا، مەيرامگۇل مەن جۇبايىنىڭ بولاشاققا دەگەن جوسپارى جارقىن ەدى. جۇمىستان شىعىپ، ۇلىنىڭ وقۋىنا بايلانىستى سەمەيگە كوشۋگە دايىندالىپ جاتىپتى. جۇمىسىن، ارىپتەستەرىن قيماي جۇرگەنىن دە ايتىپتى" دەپ جازدى ول.
سونىمەن قاتار، زاكيەۆا قازىر ەۆاكۋاتسيالىق پۋنكتتەردە 56 بالا تۇرىپ جاتقانىن، ولاردىڭ بارىمەن سولەسۋ جۇمىستارى جۇرگىزىلىپ، ءتيىستى شارالار ورىندالعانى ايتىلدى.
"ادىرنا" ۇلتتىق پورتالى
