الماتىداعى اۆتوبۋس پاركتەرىن تەكسەرۋ بارىسىندا كاتاليزاتورلارى جوق 85 اۆتوبۋس انىقتالدى. بۇل تۋرالى ءماسليحاتتىڭ كەزەكتەن تىس سەسسياسىندا قالالىق ەكولوگيا جانە قورشاعان ورتا باسقارماسى باسشىسىنىڭ ورىنباسارى ارشات باقتىگەرەەۆ مالىمدەدى، دەپ حابارلايدى «ادىرنا» ءتىلشىسى ينفورمبيۋروعا سىلتەمە جاساپ.
ونىڭ ايتۋىنشا، جالپى سانى 481 گازبەن جۇرەتىن اۆتوبۋس ەكولوگيالىق تالاپتارعا سايكەس كەلمەگەن.
«جول قوزعالىسىن ۇيىمداستىرۋ باسقارماسى ولاردى قولدانىستاعى تالاپتارعا سايكەستەندىرۋ جانە زاماناۋي ەكولوگيالىق ستاندارتتارعا ساي بولۋى ءۇشىن كاتاليزاتورلار ورناتۋ جۇمىستارىن جۇرگىزىپ جاتىر»، – دەدى باقتىگەرەەۆ.
بۇل مالىمەتتەر كولىك قۇرالدارىنان شىعاتىن زياندى قالدىقتاردى ازايتۋ شارالارىن تالقىلاۋ بارىسىندا ۇسىنىلعان. الماتى ءماسليحاتىنىڭ توراعاسى مەيىرجان وتىنشيەۆ ەكولوگيالىق تالاپتارعا ساي كەلمەيتىن كوممۋنالدىق تەحنيكاعا قاتىستى قانداي شارالار قابىلدانىپ جاتقانىن، الدە تەك جەكە كولىكتەر عانا تەكسەرىلەتىنىن سۇرادى.
ارشات باقتىگەرەەۆتىڭ ايتۋىنشا، سالالىق باسقارمالار مەن اۋدان اكىمدىكتەرى كوممۋنالدىق تەحنيكانى ەكولوگيالىق تازا وتىن تۇرلەرىنە كوشىرۋ نەمەسە ولاردىڭ قوزعالتقىشتارىن اۋىستىرۋ ءۇشىن بيۋدجەتتىك وتىنىمدەر دايىنداپ جاتىر.
ءوز كەزەگىندە مەيىرجان وتىنشيەۆ نازار تەك اۆتوبۋستارعا عانا اۋدارىلماۋى ءتيىس ەكەنىن ايتتى.
«بۇل ماسەلە كوممۋنالدىق تەحنيكاعا دا، مەملەكەتتىك ساتىپ الۋلار ارقىلى تەندەر ۇتىپ الاتىن مەردىگەر ۇيىمداردىڭ تەحنيكاسىنا دا قاتىستى. وعان قۇرىلىس تەحنيكاسى، قالانى تازالايتىن جانە اۋدانداردا جۇمىس ىستەيتىن تەحنيكالار دا كىرەدى. سوندىقتان مۇنىڭ بارلىعى ەسكەرىلۋى قاجەت»، – دەدى ءماسليحات توراعاسى.
سەسسيا بارىسىندا الماتى قالاسىنىڭ 2026–2028 جىلدارعا ارنالعان قورشاعان ورتانى قورعاۋ جونىندەگى ءىس-شارالار جوسپارى دا قارالدى. قۇجاتتا اتموسفەرالىق اۋانى قورعاۋ، قالدىقتاردى باسقارۋ، سۋ ساپاسىن باقىلاۋ، وزەندەر مەن كانالداردىڭ ارنالارىن قايتا جاڭعىرتۋ، قالانى كوگالداندىرۋ جانە جاسىل جەلەكتەردى قورعاۋ باعىتىنداعى شارالار كوزدەلگەن.
جوبا قوعامدىق تىڭداۋلاردان ءوتىپ، ەكولوگيا جانە تابيعي رەسۋرستار مينيسترلىگىمەن كەلىسىلگەن. تالقىلاۋ قورىتىندىسى بويىنشا ءماسليحات دەپۋتاتتارى شەشىم جوباسىن ءبىراۋىزدان قولدادى.
