اۋىل بالالارى حالىقارالىق ارەنادا قازاقستان نامىسىن تاعى دا ابىرويمەن قورعادى. تيمۋر قۇلىباەۆتىڭ Halyk قايىرىمدىلىق قورى جۇزەگە اسىرىپ كەلە جاتقان Auyl Sport جوباسىنىڭ جەڭىمپازدارى قىرعىزستاندا وتكەن ەكى بىردەي حالىقارالىق تۋرنيردە قولا جۇلدەگە يە بولدى.
قوستاناي وبلىسى اۋليەكول اۋىلىنىڭ قىزدار باسكەتبول كومانداسى ىستىقكول جاعالاۋىندا وتكەن II حالىقارالىق ۇلتتار كۋبوگىندا ۇزدىك ۇشتىككە ەندى. 20-27 ماۋسىم ارالىعىندا تامعا اۋىلىندا ۇيىمداستىرىلعان دوداعا قازاقستان، قىرعىزستان، تاجىكستان، وزبەكستان جانە رەسەيدەن كەلگەن 10-نان استام كوماندا قاتىستى. وسىنداي مىقتى قارسىلاستار اراسىندا اۋليەكول قىزدارى قايسار مىنەز كورسەتىپ، قولا جۇلدە جەڭىپ الدى.
ال جەتىسۋ وبلىسى پانفيلوۆ اۋدانى قوڭىرولەڭ اۋىلىنىڭ 2010-2011 جىلى تۋعان جاسوسپىرىمدەرى شولپان-اتا قالاسى، بوستەرى سەلوسىندا وتكەن «ۇلتتار دوستاستىعى كۋبوگى» حالىقارالىق تۋرنيرىندە ءۇشىنشى ورىن يەلەندى. 21-26 ماۋسىم ارالىعىندا وتكەن جارىسقا قازاقستان، وزبەكستان جانە قىرعىزستاننان 8 كوماندا قاتىستى. قازاقستان اتىنان Basket Kids, Tamos Eagles جانە Auyl Sport كوماندالارى سىنعا ءتۇستى.
بۇل تۋرنيردە ءبىرىنشى ورىندى قازاقستاننىڭ Tamos Eagles كومانداسى جەڭىپ السا، ەكىنشى ورىن قىرعىزستاننىڭ «قالقان» كومانداسىنا بۇيىردى. ال Auyl Sport نامىسىن قورعاعان قوڭىرولەڭ جاسوسپىرىمدەرى قولا جۇلدەگەر اتاندى. كوماندانىڭ 10-ءنومىرلى ويىنشىسى مۇقاتاي نۇرسۇلتان ءتۋرنيردىڭ ۇزدىك ويىنشىسى اتانىپ، MVP ارنايى سىيلىعىن يەلەندى.
قوڭىرولەڭ كومانداسىنىڭ جاتتىقتىرۋشىسى قابدولدا بەكدوس اۋىل بالالارىنىڭ كاسىبي كلۋبتارمەن تەڭ دارەجەدە ويناعانىن ەرەكشە اتاپ ءوتتى.
«Auyl Sport كومانداسىنان باسقا تۋرنيرگە قاتىسۋشىلاردىڭ بارلىعى باسكەتبول كلۋبتارى مەن ارنايى دايارلايتىن مەكتەپتەردەن كەلگەن قۇرامالار. كىشكەنتاي اۋىلدان شىققان قازاق بالالارىنىڭ ۇلكەن ارەنادا مۇنداي كوماندالارعا توتەپ بەرىپ، جۇلدەلى ورىن يەلەنۋىنىڭ ءوزى اۋىل سپورتىنىڭ الەۋەتى كۇشتى ەكەنىن دالەلدەيدى»، – دەدى قابدولدا بەكدوس.
اۋليەكول قىزدارىنىڭ جاتتىقتىرۋشىسى يگور سەروۋس تا حالىقارالىق تۋرنير اۋىل بالالارى ءۇشىن ۇلكەن تاجىريبە بولعانىن جەتكىزدى.
«قىزدارىمىز بۇل تۋرنيردە ناعىز مىنەز كورسەتتى. ءار ويىن ءبىز ءۇشىن ۇلكەن تاجىريبە بولدى. حالىقارالىق دەڭگەيدەگى كوماندالارمەن كەزدەسىپ، ءوز كۇشىمىزدى سىنادىق. وسىنداي مۇمكىندىك بەرگەن تيمۋر قۇلىباەۆتىڭ Halyk قايىرىمدىلىق قورىنا ەرەكشە العىس ايتامىز. اۋىل بالالارى ءۇشىن مۇنداي قولداۋدىڭ ماڭىزى وتە زور. بۇل جەڭىس – تەك ءبىزدىڭ كوماندانىڭ ەمەس، اۋىل سپورتىنا سەنىم ارتقان بارشا ازاماتتىڭ ورتاق جەڭىسى»، – دەدى جاتتىقتىرۋشى يگور سەروۋس.
جاس سپورتشىلاردىڭ تۋرنيرگە قاتىسۋىنا بايلانىستى جول ءجۇرۋ، تۇرۋ جانە تاماقتانۋ شىعىندارىن تيمۋر قۇلىباەۆتىڭ Halyk قايىرىمدىلىق قورى قامتاماسىز ەتتى.
Halyk قورىنىڭ اتقارۋشى ديرەكتورى عالىمبەك جاقسىلىقوۆتىڭ ايتۋىنشا، Auyl Sport جوباسى اۋىل بالالارى ءۇشىن ۇلكەن مۇمكىندىك الاڭىنا اينالىپ وتىر.
ء«بىزدىڭ جوبا – جاي عانا سپورتتىق باستاما ەمەس، بۇل – ناعىز الەۋمەتتىك ليفت. بۇل اۋىل بالالارى ءۇشىن جاڭا كوكجيەككە جول اشىپ، وزىنە سەنۋگە جانە ۇلكەن جەتىستىكتەرگە العاشقى قادام جاساۋعا بەرىلگەن مۇمكىندىك. سول ماقساتقا جەتۋ ءۇشىن ءبىز بالالاردىڭ تۋرنيرگە قاتىسۋىنا قاجەت بارلىق جاعدايدى – جول ءجۇرۋ، تۇرۋ، تاماقتانۋ، سپورتتىق كيىم جانە وزگە دە ۇيىمداستىرۋ شىعىندارىن ءوز موينىمىزعا الدىق. بالالار ەشتەڭەگە الاڭداماي، بار نازارىن دايىندىققا، ويىنعا جانە جەڭىسكە اۋدارۋى كەرەك. وسىنداي باستامالار ەرتەڭگى قازاقستاندى قۇراتىن جاستاردىڭ بويىندا سەنىم مەن مىنەز قالىپتاستىراتىنىن كورىپ وتىرمىز»، – دەدى عالىمبەك جاقسىلىقوۆ.
بۇگىندە «Auyl Sport» جوباسىنىڭ جەڭىمپازدارى رەسپۋبليكالىق دەڭگەيمەن شەكتەلمەي، شەتەلدىك جارىستاردا دا ەل ابىرويىن اسقاقتاتىپ ءجۇر. سەربيادا وتكەن ISF U-15 گيمنازياداسىندا ۇلتتىق قۇراما ساپىنداعى 22 سپورتشىنىڭ 12-ءسى وسى جوبانىڭ جەڭىمپازدارى بولدى. اۋىلدان شىققان سپورتشىلار بوكستان ءۇش التىن، ەركىن كۇرەستەن ءبىر التىن مەدال جەڭىپ الىپ، شاحماتتان حالىقارالىق ۇيىمداستىرۋشىلاردىڭ ەكى ارنايى جۇلدەسىنە يە بولدى.
سونداي-اق، جوبا قاتىسۋشىلارى اتىراۋداعى AiRomCup, استانادا وتكەن Kazakhstan Open جانە قىرعىزستانداعى حالىقارالىق ۆولەيبول تۋرنيرلەرىندە دە باق سىنادى. Kazakhstan Open دوداسىندا اۋىلدان شىققان ەكى سپورتشى كۇمىس پەن قولا جۇلدە السا، قىرعىزستانداعى حالىقارالىق تۋرنيردە قازاقستاندىق اۋىل ۆولەيبولشىلارى چەمپيون اتاندى.
ال بيىلعى اۋليەكول قىزدارى مەن قوڭىرولەڭ جاسوسپىرىمدەرىنىڭ قولا جۇلدەسى – اۋىل سپورتىنا جاسالعان سەنىمنىڭ ناقتى ناتيجەسى. بۇگىن ولار قولا الدى. ەرتەڭ سول اۋىل بالالارى قازاقستاننىڭ كوك تۋىن الەمدىك ارەنالاردا جەلبىرەتەدى.
