الماتى قالاسىندا قالتا ۇرلىعىن جاسادى دەگەن كۇدىكپەن ۇيىمداسقان قىلمىستىق توپتىڭ ءۇش مۇشەسى ۇستالىپ، قاماۋعا الىندى، دەپ حابارلايدى "ادىرنا" ۇلتتىق پورتالى.
بۇل تۋرالى قالالىق پد حابارلادى. ۆەدومستۆونىڭ حابارلاۋىنشا، كريمينالدىق پوليتسيا قىزمەتكەرلەرى قىلمىستىق سحەمانىڭ سوڭعى قاتىسۋشىسىن قولعا تۇسىرگەن. بۇعان دەيىن ونىڭ تاعى ەكى سىبايلاسى ۇستالعان بولاتىن. قازىرگى ۋاقىتتا كۇدىكتىلەردىڭ بارلىعى قاماۋدا وتىر.
تەرگەۋ مالىمەتىنە سايكەس، كۇدىكتىلەر الدىن الا ءوزارا رولدەردى ءبولىسىپ، ادام كوپ جينالاتىن ورىنداردى نىساناعا العان. ولار بازارلاردا، قوعامدىق كولىكتەردە جانە حالىق كوپ شوعىرلاناتىن وزگە دە ورىنداردا ۇيالى تەلەفون، اقشا مەن التىن بۇيىمداردى قولدى قىلعان. پوليتسەيلەر جۇرگىزگەن جەدەل-ىزدەستىرۋ ءىس-شارالارى بارىسىندا قىلمىستىق توپتىڭ بارلىق قاتىسۋشىلارى انىقتالىپ، ولاردىڭ ارەكەتتەرىنە قاتىستى دالەلدەمەلەر جينالعان.
الدىن الا مالىمەت بويىنشا، ۇستالعانداردىڭ الماتى قالاسىندا جاسالعان ونداعان مۇلىكتىك قىلمىسقا قاتىسى بولۋى مۇمكىن.
قازىر اتالعان فاكتى بويىنشا سوتقا دەيىنگى تەرگەپ-تەكسەرۋ جالعاسىپ جاتىر. سونداي-اق كۇدىكتىلەردىڭ وسىعان ۇقساس وزگە دە قىلمىستارعا قاتىسى تەكسەرىلۋدە.
