بەلارۋس پرەزيدەنتىنىڭ كىشى ۇلى نيكولاي لۋكاشەنكو پەكين ۋنيۆەرسيتەتىن «بيوتەحنولوگيا» ماماندىعى بويىنشا ءتامامداپ، ديپلوم الدى. سالتاناتتى ءراسىم 30 ماۋسىمدا بەلارۋس پەن قىتايدىڭ العاشقى بىرلەسكەن ءبىلىم بەرۋ باعدارلاماسى اياسىندا ءوتتى. بۇل تۋرالى «پۋل پەرۆوگو» Telegram ارناسى جازدى، دەپ حابارلايدى «ادىرنا» ءتىلشىسى.
ديپلوم تاپسىرۋ راسىمىنە بەلارۋس پرەزيدەنتى الەكساندر لۋكاشەنكو دە قاتىستى. ەكى ۋنيۆەرسيتەتتىڭ ديپلومىن العان بەس بەلارۋستىك تۇلەكتىڭ قاتارىندا نيكولاي دا بولدى. پرەزيدەنت ۇلىنا دەگەن ماقتانىشىن جاسىرمادى جانە وتباسىندا بيوتەحنولوگتىڭ پايدا بولعانىنا قۋانىشتى ەكەنىن ايتتى. باعدارلاماعا جالپى سانى 25 ستۋدەنت قاتىسقان.
پرەزيدەنت عىلىمنىڭ ەل دامۋى ءۇشىن اسا ماڭىزدى ەكەنىن اتاپ ءوتىپ، جاس تۇلەكتەردى وتان يگىلىگى جولىندا ەڭبەك ەتۋگە شاقىردى.
«مەنىڭ قاتاڭ تالابىم بار. سىزدەردىڭ ۋنيۆەرسيتەتتەرىڭىزدە ءبىلىم العان جاستار بەلارۋستە جۇمىس ىستەۋى ءتيىس. ولار قىتايلىق كومپانيالارمەن تىعىز ىنتىماقتاستىقتا بولىپ، ناقتى ءدارى-دارمەك وندىرۋمەن اينالىسۋى كەرەك. بۇل جاعدايدا ونكولوگيالىق اۋرۋلاردى ەمدەۋگە ارنالعان پرەپاراتتار تۋرالى ايتىپ وتىرمىز. قحر توراعاسى بۇل ۇستانىمدى قولدادى، ەشقانداي قارسىلىق بايقامادىم»، – دەدى ول.
بۇعان دەيىن الەكساندر لۋكاشەنكو ۇلى نيكولايدىڭ اۋىلداعى قاراپايىم مەكتەپتە باسقا بالالارمەن بىرگە ءبىلىم العانىن ايتقان ەدى. ونىڭ سوزىنشە، بۇل جاعداي وعان الەمدەگى بەدەلدى جوعارى وقۋ ورىندارىنىڭ ءبىرى – پەكين ۋنيۆەرسيتەتىنە تۇسۋگە كەدەرگى بولماعان.
ەسكە سالايىق، 28 ماۋسىمدا پرەزيدەنت الەكساندر لۋكاشەنكو قىتايعا رەسمي ساپارمەن بارعان بولاتىن.
