قوستاناي وبلىسىندا جاستاردى جۇمىسپەن قامتۋ، كاسىپتىك ءبىلىم الۋعا ىنتالاندىرۋ جانە كاسىپكەرلىك باستامالارىن قولداۋ باعىتىنداعى جۇمىستار جۇيەلى تۇردە جۇزەگە اسىرىلىپ كەلەدى. قابىلدانىپ جاتقان شارالاردىڭ ناتيجەسىندە وڭىردە جاستار اراسىنداعى جۇمىسسىزدىق دەڭگەيى تۇراقتى تۇردە تومەندەپ وتىر.
مەملەكەت باسشىسىنىڭ حالىقتى جۇمىسپەن قامتۋدى ارتتىرۋ جونىندەگى تاپسىرمالارى اياسىندا ەلىمىزدە «ادىلەتتى قازاقستان – بارشاعا جانە اركىمگە ارنالعان» جول كارتاسى ىسكە اسىرىلۋدا. قۇجاتقا سايكەس 2030 جىلعا دەيىن رەسپۋبليكا بويىنشا 3,3 ميلليوننان استام ازاماتتى جۇمىسپەن قامتۋ كوزدەلگەن. ونىڭ كەمىندە 2,2 ميلليونى جاستار بولۋى ءتيىس.
قوستاناي وبلىسىندا سوڭعى بەس جىل ىشىندە جاستار اراسىنداعى جۇمىسسىزدىق دەڭگەيى 3 پايىزدان 2,1 پايىزعا دەيىن تومەندەدى. بۇل كورسەتكىش رەسپۋبليكالىق دەڭگەيدەن دە تومەن. وڭىردە جاستاردى ەڭبەك نارىعىنا بەيىمدەۋ، تۇراقتى جۇمىس ورىندارىنا ورنالاستىرۋ جانە كاسىپتىك الەۋەتىن ارتتىرۋ باعىتىنداعى مەملەكەتتىك باعدارلامالار كەزەڭ-كەزەڭىمەن ىسكە اسىرىلۋدا.
جىل باسىنان بەرى جۇمىسپەن قامتۋ ورگاندارىنا جۇمىس ىزدەپ 5 مىڭعا جۋىق جاس جۇگىنگەن. سونىڭ ىشىندە 3,5 مىڭعا جۋىعى جۇمىسپەن قامتىلدى. جاستاردىڭ ءبىر بولىگى سۋبسيديالاناتىن جۇمىس ورىندارىنا جىبەرىلسە، ەندى ءبىرى قىسقا مەرزىمدى كاسىپتىك وقىتۋ كۋرستارىنان ءوتتى. سونىمەن قاتار «باستاۋ بيزنەس» جوباسى ارقىلى كاسىپكەرلىك نەگىزدەرىن مەڭگەرىپ، ءوز ءىسىن باستاۋعا مۇمكىندىك الدى.
2025 جىلعى 1 ماۋسىمداعى جاعداي بويىنشا وبلىستا 2 653 جاس جۇمىسسىز رەتىندە تىركەلگەن. ونىڭ 430-ى بەلسەندى جۇمىسپەن قامتۋ شارالارىنا قاتىسىپ جاتىر، ال 1 246 ازامات جۇمىسىنان ايىرىلۋىنا بايلانىستى الەۋمەتتىك تولەم الۋدا.
سوڭعى ءۇش جىلدا 16–35 جاس ارالىعىنداعى تىركەلگەن جۇمىسسىز جاستار سانى ەكى ەسەدەن استام قىسقاردى. ەگەر 2022 جىلى جۇمىسپەن قامتۋ ورگاندارىندا 7 458 جاس جۇمىسسىز رەتىندە تىركەلسە، بۇگىندە ولاردىڭ سانى 3 482 ادامعا دەيىن ازايدى. بۇل ەڭبەك نارىعىنداعى وڭ وزگەرىستەر مەن مەملەكەتتىك قولداۋ تەتىكتەرىنىڭ تيىمدىلىگىن كورسەتەدى.
وتكەن جىلى وبلىستا 13,8 مىڭ جاس جۇمىسپەن قامتۋ شارالارىمەن قامتىلدى. ولار الەۋمەتتىك جۇمىس ورىندارىنا ورنالاستىرىلىپ، جاستار پراكتيكاسىنا قاتىستى، كاسىپتىك ءبىلىم الىپ، قوعامدىق جۇمىستارعا تارتىلدى. سونىمەن قاتار كاسىپكەرلىك نەگىزدەرىن وقىپ، مەملەكەتتىك گرانتتارعا يە بولعان جاستاردىڭ قاتارى ارتتى.
الداعى كەزەڭدە تۇراقتى جۇمىس ورىندارىن قۇرۋدى جالعاستىرۋ، جۇمىسسىز ازاماتتاردى ناتيجەلى جۇمىسپەن قامتۋعا دەيىن ساپالى سۇيەمەلدەۋ، سونداي-اق جاستاردى كاسىپتىك وقىتۋعا، ەڭبەك نارىعىنىڭ بەلسەندى شارالارىنا جانە كاسىپكەرلىككە كەڭىنەن تارتۋ جۇمىستارى جالعاسادى. بۇل شارالار جاستاردىڭ ەڭبەك نارىعىنداعى باسەكەگە قابىلەتتىلىگىن ارتتىرىپ، ولاردىڭ تۇراقتى جۇمىسپەن قامتىلۋىنا جانە الەۋمەتتىك ءال-اۋقاتىنىڭ جاقسارۋىنا مۇمكىندىك بەرەدى.
