جوعارى اۋديتورلىق پالاتانىڭ قوستاناي وبلىسىنا جۇرگىزگەن تەكسەرىسىنەن كەيىن ايماق باسشىسى قۇمار اقساقالوۆتىڭ توراعالىعىمەن مەملەكەتتىك ءاۋديتتىڭ قورىتىندىلارى تالقىلانعان بولاتىن. وندا اۋديت كورسەتكەن قارجىلىق بۇزۋشىلىقتار، بيۋدجەت قاراجاتىن ءتيىمسىز جوسپارلاۋ جانە پايدالانۋ فاكتىلەرىنە قاتىستى تۇسىنىكتەمە بەرىلدى.
وسى ماسەلەگە قاتىستى قازاقستاننىڭ حالىق اقىنى، قازاقستان رەسپۋبليكاسى جوعارعى كەڭەسى ءحىىى شاقىرىلىمىنىڭ دەپۋتاتى ءاسيا بەركەنوۆا فەيسبۋك الەۋمەتتىك جەلىسىندە ءوزىنىڭ پىكىرىن ءبىلدىردى. وبلىسىمىزدىڭ قۇرمەتتى ازاماتى ماسەلەنى تەرەڭىنەن زەردەلەۋ كەرەكتىگىن جازىپ، اۋديتتىك قاداعالاۋ قازىنا قاراجاتىن ۇقىپتى جۇمساۋعا ىقپال ەتۋى ءتيىس ەكەندىگىن جەتكىزدى. ءبىز حالىق اقىنىنىڭ كوپشىلىككە ۇندەۋىن جاريالاۋدى ءجون كوردىك.
"قۇرمەتتى اعايىن!
كۇنى كەشە جوعارى اۋديتورلىق پالاتانىڭ قوستاناي وبلىسىنا جۇرگىزگەن تەكسەرىسى قوعامدى ءدۇر سىلكىندىردى. ەرىنبەگەن اقپارات قۇرالدارىنىڭ بارلىعى «قوستاناي وبلىسىندا 100 ميلليارد تەڭگە ءراسۋا بولدى»، «جەلگە ۇشقان ميللياردتار» دەگەن سىڭايلى وڭدى-سولدى تاقىرىپتى قويىپ، بىرىنەن-ءبىرى كوشىرىپ باسىپ جاتىر. الەۋمەتتىك جەلىدە جەلپىنىپ وتىرعاندار اتشا تۋلاپ، ءورتتى ودان بەتەر ورشىتە ءتۇستى.
سول ەسەپ-قيساپتىڭ ىشكى مازمۇنىنا ءۇڭىلىپ، ەسەپ تىلىمەن، ەكونوميكالىق، قارجىلىق ساۋاتپەن ساراپتاپ جاتقان ەشقايسىسىن كورمەدىم. سوعان قاراپ-اق، ءبىز ءسوز قۋعان ەل ەكەنبىز دەپ اشىنىپ وتىرمىن.
وسى ۇندەۋدى حالىققا جەتكىزىپ وتىرعانىمنىڭ سەبەبى دە بار. بۇل جەردە باسشىلارعا جاعىنايىن، بىرەۋدىڭ مۇددەسىن قورعايىن، اقتاپ الايىن دەگەن نيەتىم جوق. (بولمىسىما جاعىمپازدىق جات).
قاسيەتتى قوستاناي توپىراعىنىڭ تۋماسى بولعاندىقتان، ءوڭىرىمىزدىڭ وركەندەۋ كەزەڭىنە كۋاگەر جانداردىڭ ءبىرىمىن. تالاي جىل ايتىس ساحناسىندا ءوڭىرىمىزدىڭ نامىسىن قورعاپ، بەدەلىن بيىكتەتكەن اقىن رەتىندە ەشقاشان ايماعىمىزدىڭ ابىرويىنا داق تۇسكەنىن قالامايمىن. قوستاناي وبلىسى ەكونوميكانىڭ سان ءتۇرلى سالاسىندا جىل سايىن العا باسىپ، وركەندەپ كەلەدى. بۇگىنگى كۇنى تاۋ-كەن ءوندىرىسى العا باسقان، جاڭا زاۋىتتار سالىنىپ، جۇمىس ورىندارى اشىلىپ جاتقان ءىرى يندۋستريالىق ايماققا اينالىپ كەلەمىز.
جەلىدە ءسوز بولىپ جاتقان تاقىرىپ جايىندا وبلىس اكىمى قۇمار اقساقالوۆ باستاعان ايماقتىڭ اتقامىنەرلەرى ولقىلىقتارعا جول بەرگەن تۇلعالاردىڭ جاۋاپقا تارتىلىپ جاتقانىن مالىمدەدى. بۇل جاعداي مەملەكەتتىك قىزمەتكەرلەردى ءوز ىسىنە اسا ۇلكەن جاۋاپكەرشىلىكپەن قاراۋعا مىندەتتەۋى ءتيىس.
بارلىق وبلىستا بەس جىل سايىن جوسپارلى تۇردە اۋديتورلىق تەكسەرىس وتكىزىلۋى قالىپتى شارا. اۋديتتىك قاداعالاۋ قازىنا قاراجاتىن ۇقىپتى جۇمساۋعا ىقپال ەتۋى ءتيىس.
سوندىقتان بۇل جاعدايدا دابىراعا جول بەرمەي، كەمشىلىكتەردى كەمىتىپ، ولقىلىقتاردى ويسىراتپاي، اركىم ءوز ىسىنە دەگەن جاۋاپكەرشىلىكتى ەل ءۇشىن جاۋاپكەرشىلىك دەپ قاراسا عانا، ءىس العا باسادى دەپ ويلايمىن.
ەڭ باستىسى، ءوزىمىز توپىراعىن باسىپ، سۋىن ءىشىپ وتىرعان ايماعىمىز وركەندەي بەرسىن دەيمىن. قوستاناي وبلىسى ءالى تالاي بيىكتەردى باعىندىرىپ، الەۋەتى ارتقان ۇلكەن قۋاتتى وڭىرگە اينالادى دەگەن سەنىمدەمىن".
