ەلوردادا جوعالىپ كەتكەن 23 جاستاعى جىگىت قوستانايدان تابىلدى. بۇل تۋرالى Polisia.kz مالىمدەدى، دەپ حابارلايدى “ادىرنا” ۇلتتىق پورتالى.
جاس جىگىتتى تۋىستارى ءبىر جىلعا جۋىق ىزدەگەن. 21 قاڭتاردا كۇندىزگى ۋاقىتتا جىگىت ۇيىنەن شىعىپ كەتىپ، قايتىپ ورالماعان. پوليتسياعا جوعالعان ءىنىسى تۋرالى ونىڭ اپكەسى حابارلاعان.
جاس جىگىتتى ىزدەۋگە ەلوردالىق پوليتسيانىڭ جەكە قۇرامى جۇمىلدىرىلعان. ىزدەستىرۋ ءىس-شارالارى بارىسىندا ءتارتىپ ساقشىلارى جوعالعان ازاماتتىڭ بولۋى مۇمكىن جەرلەردى زەرتتەپ، ونى سوڭعى رەت كورگەن ادامدارعا سۇراۋ سالعان. قولدانىلعان شارالار ناتيجەسىندە ەلوردا تۇرعىنى قوستاناي قالاسىنان تابىلدى. وندا ول اسپازشى بولىپ جۇمىس ىستەگەنى جانە جالدامالى پاتەردە تۇرعانى بەلگىلى بولدى.
جاس جىگىت قۇمار ويىنىنان اقشا ۇتىلىپ، قارىز بولىپ قالعاندىقتان، ۇيدەن كەتىپ قالعانىن ءتۇسىندىردى. جىگىتتىڭ ۇيىنەن ءبىرىنشى رەت كەتىپ قالماعانى جانە ويىن ويناۋعا قۇمار ەكەندىگى انىقتالدى. قازىرگى ۋاقىتتا جىگىت تۋىستارىنىڭ جانىندا.
تابىلعان جىگىتتىڭ تۋىستارى الماتى اۋدانىنىڭ پوليتسيا قىزمەتكەرلەرىنە العىس ايتتى.
«جەدەل ۋاكىلدەر ەربولات جانۇزاقوۆ پەن ايدار قاليەۆكە ءوزىنىڭ قىزمەتتىك مىندەتتەرىن ادال اتقارعانى ءۇشىن ەرەكشە العىس ايتقىم كەلەدى. پوليتسيا قىزمەتكەرلەرى مەنىڭ باۋىرىمدى ىزدەپ، تاۋىپ بەردى»، – دەپ العىسىن ءبىلدىردى جىگىتتىڭ اعاسى.
