Qostanai oblysynda jastardy jūmyspen qamtu, käsıptık bılım aluǧa yntalandyru jäne käsıpkerlık bastamalaryn qoldau baǧytyndaǧy jūmystar jüielı türde jüzege asyrylyp keledı. Qabyldanyp jatqan şaralardyŋ nätijesınde öŋırde jastar arasyndaǧy jūmyssyzdyq deŋgeiı tūraqty türde tömendep otyr.
Memleket basşysynyŋ halyqty jūmyspen qamtudy arttyru jönındegı tapsyrmalary aiasynda elımızde «Ädılettı Qazaqstan – barşaǧa jäne ärkımge arnalǧan» jol kartasy ıske asyryluda. Qūjatqa säikes 2030 jylǧa deiın respublika boiynşa 3,3 millionnan astam azamatty jūmyspen qamtu közdelgen. Onyŋ kemınde 2,2 milliony jastar boluy tiıs.
Qostanai oblysynda soŋǧy bes jyl ışınde jastar arasyndaǧy jūmyssyzdyq deŋgeiı 3 paiyzdan 2,1 paiyzǧa deiın tömendedı. Būl körsetkış respublikalyq deŋgeiden de tömen. Öŋırde jastardy eŋbek naryǧyna beiımdeu, tūraqty jūmys oryndaryna ornalastyru jäne käsıptık äleuetın arttyru baǧytyndaǧy memlekettık baǧdarlamalar kezeŋ-kezeŋımen ıske asyryluda.
Jyl basynan berı jūmyspen qamtu organdaryna jūmys ızdep 5 myŋǧa juyq jas jügıngen. Sonyŋ ışınde 3,5 myŋǧa juyǧy jūmyspen qamtyldy. Jastardyŋ bır bölıgı subsidiialanatyn jūmys oryndaryna jıberılse, endı bırı qysqa merzımdı käsıptık oqytu kurstarynan öttı. Sonymen qatar «Bastau Biznes» jobasy arqyly käsıpkerlık negızderın meŋgerıp, öz ısın bastauǧa mümkındık aldy.
2025 jylǧy 1 mausymdaǧy jaǧdai boiynşa oblysta 2 653 jas jūmyssyz retınde tırkelgen. Onyŋ 430-y belsendı jūmyspen qamtu şaralaryna qatysyp jatyr, al 1 246 azamat jūmysynan aiyryluyna bailanysty äleumettık tölem aluda.
Soŋǧy üş jylda 16–35 jas aralyǧyndaǧy tırkelgen jūmyssyz jastar sany ekı eseden astam qysqardy. Eger 2022 jyly jūmyspen qamtu organdarynda 7 458 jas jūmyssyz retınde tırkelse, bügınde olardyŋ sany 3 482 adamǧa deiın azaidy. Būl eŋbek naryǧyndaǧy oŋ özgerıster men memlekettık qoldau tetıkterınıŋ tiımdılıgın körsetedı.
Ötken jyly oblysta 13,8 myŋ jas jūmyspen qamtu şaralarymen qamtyldy. Olar äleumettık jūmys oryndaryna ornalastyrylyp, jastar praktikasyna qatysty, käsıptık bılım alyp, qoǧamdyq jūmystarǧa tartyldy. Sonymen qatar käsıpkerlık negızderın oqyp, memlekettık granttarǧa ie bolǧan jastardyŋ qatary artty.
Aldaǧy kezeŋde tūraqty jūmys oryndaryn qūrudy jalǧastyru, jūmyssyz azamattardy nätijelı jūmyspen qamtuǧa deiın sapaly süiemeldeu, sondai-aq jastardy käsıptık oqytuǧa, eŋbek naryǧynyŋ belsendı şaralaryna jäne käsıpkerlıkke keŋınen tartu jūmystary jalǧasady. Būl şaralar jastardyŋ eŋbek naryǧyndaǧy bäsekege qabılettılıgın arttyryp, olardyŋ tūraqty jūmyspen qamtyluyna jäne äleumettık äl-auqatynyŋ jaqsaruyna mümkındık beredı.
