Qostanaida qazaq poeziiasynyŋ körnektı ökılı, aqyn ärı audarmaşy Keŋşılık Aǧytaiūly Myrzabektıŋ tuǧanyna 80 jyl toluyna arnalǧan «Iŋkär dünie» ädebi-sazdy keşı öttı.
Aqynnyŋ 80 jyldyǧyna arnalǧan ädebi keşke qatysuşylarǧa Memleket basşysy Qasym-Jomart Toqaevtyŋ joldaǧan qūttyqtauyn Qazaqstan Respublikasy Prezidentınıŋ keŋesşısı Mälık Otarbaev oqyp berdı.
Prezident öz qūttyqtauynda Keŋşılık Myrzbektı qazaq poeziiasyna airyqşa qoltaŋbasymen kelıp, töl ädebiettıŋ damuyna eleulı üles qosqan daryndy tūlǧa retınde atap öttı.
«Keŋşılık Myrzabek – qazaq poeziiasyna airyqşa qoltaŋbasymen kelıp, töl ädebietımızdı damytuǧa eleulı üles qosqan daryndy tūlǧa. Onyŋ syrşyl jyrlarynda tuǧan jerge degen süiıspenşılık, el taǧdyryna degen jauapkerşılık jäne adam bolmysynyŋ tereŋ iırımderı şeber suretteldı. Aqynnyŋ azamattyq ünı men körkemdık ızdenısı ūlttyq söz önerınıŋ örısın keŋeittı», – delıngen Prezidenttıŋ qūttyqtauynda.
Memleket basşysy aqynnyŋ şyǧarmaşylyq mūrasyn halqymyzdyŋ ruhaniiatyna qosylǧan qūndy qazyna dep atap, onyŋ eŋbekterın jinaqtau men jan-jaqty zertteudıŋ maŋyzdylyǧyna nazar audardy.
«Keŋşılık Myrzabektıŋ taǧylymdy mūrasy – halqymyzdyŋ ruhaniiatyna qosylǧan qūndy qazyna. Aqynnyŋ şyǧarmalaryn jinaqtau, jan-jaqty zertteu – barşamyzdyŋ ortaq mındetımız», – dedı Memleket basşysy.
Qūttyqtauda Memleket basşysy söz zergerınıŋ esımı el jadynda saqtalyp, şoqtyǧy biık şyǧarmalary halqymen bırge jasai beretınıne senım bıldırdı.
Saltanatty şarada Qostanai oblysynyŋ äkımı Qūmar Aqsaqalov aqynnyŋ şyǧarmaşylyq mūrasynyŋ maŋyzdylyǧyna toqtalyp, öŋırde ädebiet pen ruhaniiatty därıpteuge baǧyttalǧan jūmystardyŋ jüielı jürgızılıp kele jatqanyn atap öttı.
«Tobyl-Torǧai öŋırı aqyndaryn erekşe ardaq tūtqan el. Bız ruhaniiatty damytu, ädebi mūrany därıpteu jäne qalamgerler eŋbegın keŋınen nasihattau jūmystaryn jüielı jalǧastyryp kelemız. Keŋşılık aqynnyŋ qūrmetıne Torǧaida jas talanttardyŋ baiqauy ūiymdastyryldy. Tuǧan jerden bastau alǧan ruhani şara bügın Qostanai törınde jalǧasyp otyr. Aqynnyŋ jyrlary men önegesı ūrpaqtan-ūrpaqqa jetıp, ruhani mūra bolyp qala beredı», – dedı öŋır basşysy.
Keŋşılık Myrzabek 1946 jyly Jangeldin audanynyŋ Aqşyǧanaq auylynda düniege kelgen. 42 jyl ǧūmyr keşken aqyn qazaq ädebietınde özındık qoltaŋbasyn qalyptastyryp, tuǧan jerge degen süiıspenşılıktı, el taǧdyryna jauapkerşılıktı jäne adam bolmysyn tereŋ jyrlady.
Qalamgerdıŋ «Iŋkär dünie», «Dübırlı däuren», «Säruar», «Balalyq şaq balladalary», «Däuır – dastan» atty jyr jinaqtary oqyrmanǧa keŋınen tanyldy. «Balalyq şaq balladalary» jinaǧy üşın aqyn 1987 jyly Iliias Jansügırov atyndaǧy syilyqtyŋ laureaty atandy.
