جاڭا كونستيتۋتسيا: ادۆوكاتۋرانىڭ كونستيتۋتسيالىق مارتەبەسى، زياتكەرلىك مەنشىك قۇقىقتارىن قورعاۋ جانە زاڭداردىڭ كەرى كۇشىنە جول بەرمەۋ

قازاقستان رەسپۋبليكاسىندا ادام مەن ازاماتتىڭ قۇقىقتارى مەن بوستاندىقتارىن قورعاۋدىڭ زاماناۋي ستاندارتتارىن بەكىتكەن جاڭا كونستيتۋتسيا رەسمي تۇردە كۇشىنە ەندى. جاڭا نەگىزگى زاڭ بىلىكتى زاڭ كومەگىن كورسەتۋ جۇيەسىن ەداۋىر كۇشەيتەتىن، زياتكەرلىك مەنشىك قۇقىقتارىن قورعاۋعا كەپىلدىك بەرەتىن جانە زاڭنامانىڭ قۇقىقتىق ايقىندىلىعى مەن بولجامدىلىعىن قامتاماسىز ەتەتىن بىرقاتار ىرگەلى كونستيتۋتسيالىق جاڭاشىلدىقتاردى بەكىتتى.

ماڭىزدى جاڭاشىلدىقتاردىڭ ءبىرى – ادۆوكاتۋرا ينستيتۋتىنىڭ كونستيتۋتسيالىق دەڭگەيدە بەكىتىلۋى. ەندى كونستيتۋتسيادا ادۆوكاتۋرا ءاربىر ادامنىڭ بىلىكتى زاڭ كومەگىن الۋعا جانە ءوز قۇقىقتارى مەن زاڭدى مۇددەلەرىن قورعاۋعا دەگەن قۇقىعىن ىسكە اسىرۋعا جاردەمدەسەتىنى تىكەلەي ايقىندالعان. بۇل قۇقىقتىق كومەكتىڭ قولجەتىمدىلىگىن ارتتىرۋعا جانە قوعامنىڭ سوت پەن قۇقىقتىق جۇيەگە دەگەن سەنىمىن نىعايتۋعا ىقپال ەتەدى.

تاعى ءبىر ماڭىزدى شەشىم – زياتكەرلىك مەنشىك قۇقىقتارىن كونستيتۋتسيالىق دەڭگەيدە تىكەلەي قورعاۋدىڭ بەكىتىلۋى. بۇل شىعارماشىلىق جانە عىلىمي قىزمەت ناتيجەلەرىنىڭ ءبىلىم ەكونوميكاسىن، كرەاتيۆتى يندۋستريالاردى جانە يننوۆاتسيالىق سەكتوردى دامىتۋداعى ماڭىزدى قۇقىقتىق ءارى ەكونوميكالىق قۇندىلىق ەكەنىن ايقىندايدى، سونداي-اق قازاقستاننىڭ ينۆەستيتسيالىق تارتىمدىلىعىن ارتتىرۋعا ىقپال ەتەدى.

ەلەۋلى كونستيتۋتسيالىق جاڭاشىلدىقتاردىڭ ءبىرى – زاڭدارعا كەرى كۇش بەرۋگە تىكەلەي تىيىم سالىنۋى. كونستيتۋتسيادا قوسىمشا مىندەتتەر جۇكتەيتىن نەمەسە جاۋاپتىلىقتى كۇشەيتەتىن جاڭا نورمالاردىڭ ولار كۇشىنە ەنگەنگە دەيىن تۋىنداعان قۇقىقتىق قاتىناستارعا قولدانىلمايتىنى بەكىتىلگەن. مۇنداي ءتاسىل ازاماتتار مەن بيزنەس ءۇشىن قۇقىقتىق ايقىندىق پەن زاڭنامانىڭ بولجامدىلىعىن قامتاماسىز ەتىپ، بۇرىن قالىپتاسقان قۇقىقتىق قاتىناستارعا جاڭا تالاپتاردىڭ قولدانىلۋ قاۋپىنسىز ۇزاق مەرزىمدى شەشىمدەر قابىلداۋعا جانە ءوز قىزمەتىن جوسپارلاۋعا مۇمكىندىك بەرەدى. سونىمەن قاتار، بۇل كونستيتۋتسيالىق كەپىلدىك زاڭ شىعارۋشى جانە قۇقىق قولدانۋ ورگاندارى ءۇشىن ناقتى باعدار بەلگىلەيدى: زاڭناماداعى كەز كەلگەن وزگەرىستەر قۇقىقتىق ايقىندىق، ادىلدىك جانە تۇلعالاردىڭ قۇقىقتىق جاعدايىن كەرى كۇشىمەن ناشارلاتۋعا جول بەرمەۋ قاعيداتتارىن ساقتاي وتىرىپ قابىلدانىپ، قولدانىلۋعا ءتيىس.