قوستاناي قالاسىندا «حالىق كونستيتۋتسياسى – ۇلتتىق قۇندىلىقتار مەن بىرلىكتىڭ ايناسى» تاقىرىبىندا قازاقستان رەسپۋبليكاسىنىڭ جاڭا كونستيتۋتسياسىن قولداۋعا ارنالعان ساراپتامالىق الاڭ ءوتتى.
ءىس-شارانىڭ نەگىزگى ماقساتى – جاڭا كونستيتۋتسيانىڭ باستى ەرەجەلەرىن تالقىلاۋ، ونىڭ مازمۇنى مەن پراكتيكالىق ماڭىزىن ءتۇسىندىرۋ، سونداي-اق ازاماتتاردىڭ قۇقىقتارى مەن بوستاندىقتارىن قورعاۋعا، مەملەكەتتىك قۇرىلىستى نىعايتۋعا جانە ەلدىڭ تۇراقتى دامۋىن قامتاماسىز ەتۋگە باعىتتالعان كونستيتۋتسيالىق قاعيداتتاردى كەڭىنەن ءتۇسىندىرۋ بولدى.
جيىنعا قوستاناي وبلىسى اكىمىنىڭ ورىنباسارى باقىتجان حابەروۆيچ نارىمبەتوۆ مودەراتور رەتىندە قاتىسىپ، كىرىسپە ءسوز سويلەدى. سونىمەن قاتار قازاقستان رەسپۋبليكاسى پارلامەنتى ءماجىلىسىنىڭ دەپۋتاتى ءۇنزىلا شاپاق، سەنات دەپۋتاتى بيبىگۇل بەركۋتوۆنا اققوجينا، قوستاناي وبلىستىق ءماسليحاتىنىڭ توراعاسى، كونستيتۋتسيالىق رەفورما جونىندەگى كوميسسيا مۇشەسى سايلاۋبەك ەرعازيەۆيچ ەششانوۆ، قوستاناي وبلىستىق قوعامدىق كەڭەسىنىڭ توراعاسى سەرىك شىڭعىسۇلى بەكتۇرعانوۆ، «AMANAT» پارتياسى قوستاناي وبلىستىق فيليالىنىڭ توراعاسى، «ادىلەتتى جانە پروگرەسسيۆتى قازاقستاننىڭ حالىقتىق كونستيتۋتسياسى ءۇشىن!» وڭىرلىك كواليتسياسىنىڭ توراعاسى المات قاكيمجانۇلى دوسمۇحامەدوۆ بايانداما جاسادى.
سپيكەرلەر ءوز سوزدەرىندە كونستيتۋتسيانىڭ قوعامداعى رولىنە، ۇلتتىق قۇندىلىقتاردى ساقتاۋداعى ماڭىزىنا، ازاماتتىق بىرلىكتى نىعايتۋداعى جانە ادىلەتتى مەملەكەت قالىپتاستىرۋداعى ورنىنا ەرەكشە توقتالدى.
ءىس-شارا بارىسىندا قاتىسۋشىلار اراسىندا سۇراق-جاۋاپ الاڭى ۇيىمداستىرىلىپ، وزەكتى ماسەلەلەر بويىنشا پىكىر الماسۋ ءوتتى. ساراپشىلار جاڭا كونستيتۋتسيانىڭ حالىق مۇددەسىنە نەگىزدەلگەنىن جانە ەلدىڭ بولاشاق دامۋىنا بەرىك قۇقىقتىق نەگىز قالىپتاستىراتىنىن اتاپ ءوتتى.
