ۋكراينا جوعارعى راداسى ەلدىڭ ۇلتتىق پانتەونىن قۇرۋدى كوزدەيتىن زاڭدى قابىلدادى. ءتيىستى شەشىمدى 287 دەپۋتات قولداعان، دەپ حابارلايدى «ادىرنا» ءتىلشىسى BBC-گە سىلتەمە جاساپ.
باتىرلار مەن كورنەكتى قايراتكەرلەرىنىڭ قۇرمەتىنە ارنالعان مەموريال — ۇلتتىق پانتەون تۋرالى زاڭ جوباسىن ەل پرەزيدەنتى ۆلاديمير زەلەنسكي 28 ماۋسىمدا جوعارعى رادا قاراۋىنا ەنگىزگەن. بۇل تۋرالى ول كيەۆ-پەچەرسك لاۆراسىندا وتكەن كونستيتۋتسيا كۇنىنە ارنالعان ءىس-شارادا مالىمدەدى.
ء«ارتۇرلى عاسىرلار مەن داۋىرلەردە ۋكراينا ءۇشىن كۇرەسكەن، ەلدى شابىتتاندىرعان بارلىق باتىردىڭ ەسىمى بىرىكتىرىلىپ، مەملەكەت تاراپىنان زور قۇرمەت جانە ىقىلاسپەن تاريحىمىزعا ماڭگى جازىلادى»، – دەدى زەلەنسكي.
سول كۇنى كيەۆ-پەچەرسك لاۆراسىندا يۆان مازەپانىڭ ءبيۋستى دە اشىلدى.
زاڭ جوباسىنا سايكەس، پانتەوندا مەملەكەت باسشىلارىنىڭ، قارۋلى كۇشتەر باس قولباسشىلارىنىڭ جانە ۋكراينانىڭ تاۋەلسىزدىگىنە، قۇرىلۋى مەن دامۋىنا تاريحي ۇلەس قوسقان وزگە دە تۇلعالاردىڭ ەسىمى ماڭگىلىككە ۇلىقتالادى. سونىمەن قاتار ۋكراينامەن بايلانىستى نوبەل سىيلىعىنىڭ لاۋرەاتتارى مەن الەمدىك دەڭگەيدەگى قايراتكەرلەردى دە وسى پانتەونعا جەرلەۋگە مۇمكىندىك بەرىلەدى.
ازىرگە ەسىمى پانتەوندا ماڭگىلىككە قالدىرىلاتىن قاھارمانداردىڭ ناقتى ءتىزىمى جاريالانعان جوق.
پانتەون كيەۆ قالاسىندا ورنالاسادى، الايدا ونىڭ ناقتى ورنى ازىرگە بەلگىسىز. قازىر بىرنەشە نۇسقا قاراستىرىلىپ جاتقانى حابارلاندى.
ۋكراينا پرەزيدەنتى كەڭسەسىنىڭ باسشىسى كيريلل بۋدانوۆ پانتەون قۇرۋ تۋرالى زاڭنىڭ قابىلدانۋىن «كوپتەگەن ۇرپاقتىڭ كۇرەسى، ەڭبەگى، جانقيارلىعى مەن قىزمەتىنىڭ ناتيجەسى» دەپ باعالادى. ونىڭ ايتۋىنشا، بۇل شەشىم «ۋكراين مەملەكەتتىلىگىن نىعايتۋ جولىنداعى ماڭىزدى قادام» بولىپ سانالادى.
