Ukraina Joǧarǧy Radasy eldıŋ ūlttyq panteonyn qūrudy közdeitın zaŋdy qabyldady. Tiıstı şeşımdı 287 deputat qoldaǧan, dep habarlaidy «Adyrna» tılşısı BBC-ge sılteme jasap.
Batyrlar men körnektı qairatkerlerınıŋ qūrmetıne arnalǧan memorial — Ūlttyq panteon turaly zaŋ jobasyn el prezidentı Vladimir Zelenskii 28 mausymda Joǧarǧy Rada qarauyna engızgen. Būl turaly ol Kiev-Pechersk lavrasynda ötken Konstitusiia künıne arnalǧan ıs-şarada mälımdedı.
«Ärtürlı ǧasyrlar men däuırlerde Ukraina üşın küresken, eldı şabyttandyrǧan barlyq batyrdyŋ esımı bırıktırılıp, memleket tarapynan zor qūrmet jäne yqylaspen tarihymyzǧa mäŋgı jazylady», – dedı Zelenskii.
Sol künı Kiev-Pechersk lavrasynda İvan Mazepanyŋ biustı de aşyldy.
Zaŋ jobasyna säikes, panteonda memleket basşylarynyŋ, qaruly küşter bas qolbasşylarynyŋ jäne Ukrainanyŋ täuelsızdıgıne, qūryluy men damuyna tarihi üles qosqan özge de tūlǧalardyŋ esımı mäŋgılıkke ūlyqtalady. Sonymen qatar Ukrainamen bailanysty Nobel syilyǧynyŋ laureattary men älemdık deŋgeidegı qairatkerlerdı de osy panteonǧa jerleuge mümkındık berıledı.
Äzırge esımı panteonda mäŋgılıkke qaldyrylatyn qaharmandardyŋ naqty tızımı jariialanǧan joq.
Panteon Kiev qalasynda ornalasady, alaida onyŋ naqty orny äzırge belgısız. Qazır bırneşe nūsqa qarastyrylyp jatqany habarlandy.
Ukraina prezidentı keŋsesınıŋ basşysy Kirill Budanov panteon qūru turaly zaŋnyŋ qabyldanuyn «köptegen ūrpaqtyŋ küresı, eŋbegı, janqiiarlyǧy men qyzmetınıŋ nätijesı» dep baǧalady. Onyŋ aituynşa, būl şeşım «ukrain memlekettılıgın nyǧaitu jolyndaǧy maŋyzdy qadam» bolyp sanalady.
