مەملەكەت باسشىسى قاسىم-جومارت توقاەۆ دونالد ترامپقا امەريكا قۇراما شتاتتارىنىڭ تاۋەلسىزدىك كۇنىنە وراي قۇتتىقتاۋ جەدەلحاتىن جولدادى، دەپ حابارلايدى "ادىرنا" ۇلتتىق پورتالى.
بۇل تۋرالى اقوردانىڭ ءباسپاسوز قىزمەتى حابارلادى.
پرەزيدەنت اقش تاۋەلسىزدىگىنىڭ 250 جىلدىعىنىڭ تاريحي ماڭىزىنا توقتالىپ، بۇل كۇن امەريكالىق حالىقتىڭ بوستاندىق، تەڭدىك جانە ادىلدىك قاعيداتتارىنا ادالدىعىنىڭ سيمۆولى ەكەنىن اتاپ ءوتتى.
سونداي-اق قاسىم-جومارت توقاەۆ دونالد ترامپتىڭ قازاقستان مەن اقش اراسىنداعى قارىم-قاتىناستىڭ سەرپىندى دامۋىنا قوسقان جەكە ۇلەسىن جوعارى باعالاپ، كەڭەيتىلگەن ستراتەگيالىق سەرىكتەستىكتى ودان ءارى نىعايتۋعا دايىن ەكەنىن جەتكىزدى.
مەملەكەت باسشىسى دونالد ترامپقا جاۋاپتى مەملەكەتتىك قىزمەتىندە تابىس، ال اقش حالقىنا باق-بەرەكە مەن ءوسىپ-وركەندەۋ تىلەدى.
امەريكا قۇراما شتاتتارى بۇگىن ەل تاۋەلسىزدىگىنىڭ 250 جىلدىعىن اتاپ وتۋدە. وسىدان تۋرا 250 جىل بۇرىن، 1776 جىلعى 4 شىلدەدە فيلادەلفيا قالاسىندا امەريكا قۇراما شتاتتارىنىڭ تاۋەلسىزدىك دەكلاراتسياسىنىڭ قابىلدانۋى ماقۇلداندى.
قۇجاتتى ەكىنشى كونتينەنتتىك كونگرەسس قابىلداپ، سولتۇستىك امەريكاداعى ۇلىبريتانيانىڭ بۇرىنعى 13 وتارى ءوز تاۋەلسىزدىگىن جاريالادى. وسىلايشا، كەيىن الەمدەگى ەڭ ءىرى ەكونوميكالاردىڭ بىرىنە اينالعان امەريكا قۇراما شتاتتارى قۇرىلدى.
مەرەيتويعا وراي اقش پرەزيدەنتى دونالد ترامپ Freedom 250 اتتى اۋقىمدى مەرەكەلىك باعدارلامانى ۇيىمداستىرۋدى قولعا الدى. نەگىزگى ءىس-شارالار ۆاشينگتون قالاسىندا وتەدى
