كاسپي تەڭىزىندەگى سۋ دەڭگەيىنىڭ تومەندەۋى رەسەي اۋماعىنداعى نوردوۆىي ارالىنىڭ بىرتىندەپ قۇرلىقپەن تۇتاسۋىنا اكەلىپ وتىر. اۋماعى شامامەن 63 گەكتار بولاتىن ارال الداعى جىلدارى ماتەريكتىڭ ءبىر بولىگىنە اينالۋى مۇمكىن. بۇل تۋرالى SHOT Telegram ارناسى جازدى، دەپ حابارلايدى "ادىرنا".
SHOT مالىمەتىنشە، كيزليار شىعاناعىندا ورنالاسقان نوردوۆىي ارالى سوڭعى جىلدارى جاعالاۋعا جاقىنداي تۇسكەن. تەڭىز سۋىنىڭ شەگىنۋىنەن تاياز بۇعازدار كەۋىپ، ارال مەن قۇرلىقتىڭ اراسىنداعى جاڭا جەر تەلىمدەرى پايدا بولۋدا. سوڭعى بەس جىلدا كاسپي تەڭىزىنىڭ دەڭگەيى شامامەن 1,5 مەترگە تومەندەگەن.
جاريالانىم اۆتورلارىنىڭ بولجامىنشا، ەگەر سۋ دەڭگەيى قازىرگى قارقىنمەن تومەندەي بەرسە، الداعى 20 جىلدا تەڭىز تاعى 4–5 مەترگە تارتىلۋى ىقتيمال. مۇنداي جاعدايدا نوردوۆىي ارالى قۇرلىقپەن تولىق قوسىلادى. بۇدان بولەك، وزگە ارالدار دا بىرتىندەپ قۇرلىققا اينالىپ، ولاردىڭ ورنىندا جاڭا تۇبەكتەر مەن جەر اۋماقتارى پايدا بولۋى مۇمكىن.
مامانداردىڭ ايتۋىنشا، سوڭعى 4–5 جىلدا كاسپيدىڭ سولتۇستىك بولىگىندە تەڭىز سۋىنىڭ شەگىنۋىنە بايلانىستى جاڭا قۇرلىق اۋماقتارى قالىپتاسا باستاعان. مۇنداي وزگەرىستەر كاسپي يتبالىقتارى مەكەندەيتىن قۇلالى، مورسكوي، سۆياتوي، پودگورنىي، ءۇشارال، ماياكشىققان جانە دولگي ارالدارىنىڭ ماڭىندا دا بايقالىپ وتىر.
