قازاق ۇلتتىق سپورت ۋنيۆەرسيتەتىنىڭ نەگىزىن قالاۋشى نۇراسىل مەدەۋ وقۋ ورنىن مەملەكەتكە وتەۋسىز بەرۋ تۋرالى شەشىم قابىلدادى، دەپ حابارلايدى "ادىرنا" ۇلتتىق پورتالى.
2021 جىلى 150 ستۋدەنتى بار دەنە شىنىقتىرۋ جانە بۇقارالىق سپورت اكادەمياسى رەتىندە قۇرىلعان وقۋ ورنى بۇگىندە بەس مىڭعا جۋىق ستۋدەنت ءبىلىم الاتىن ۋنيۆەرسيتەتكە اينالعان.
بەس جىل ىشىندە ۋنيۆەرسيتەت حالىقارالىق سەرىكتەستىكتەر ورناتىپ، سپورت عىلىمىن دامىتۋعا ارنالعان زەرتحانالار مەن ورتالىقتار اشقان. سونىمەن قاتار قوس ديپلومدى ءبىلىم بەرۋ باعدارلامالارىن ىسكە قوسىپ، سپورتتىڭ ءتۇرلى باعىتتارى بويىنشا جوبالاردى جۇزەگە اسىرعان.
ۋنيۆەرسيتەت نەگىزىن قالاۋشىنىڭ ايتۋىنشا، وقۋ ورنىن مەملەكەتكە بەرۋ تۋرالى شەشىم كەيىننەن قابىلدانباعان. مۇنداي نيەت ۋنيۆەرسيتەت قۇرىلعان كەزدەن باستاپ بولعان.
«كەز كەلگەن الىپقاشپا اڭگىمەگە نۇكتە قويعىم كەلەدى. بۇل – ساتۋ دا ەمەس، سەنىمگەرلىك باسقارۋعا بەرۋ دە ەمەس، ءماجبۇرلى تۇردە جاسالعان قادام دا ەمەس. بۇل – تۋعان ەلىمە جاسالعان وتەۋسىز سىي»، – دەدى نۇراسىل مەدەۋ.
ۋنيۆەرسيتەت حالىقارالىق وليمپيادا كوميتەتىمەن بىرلەسىپ، وليمپيادالىق زەرتتەۋلەر، ءبىلىم بەرۋ جانە مۇرا ورتالىعىن اشقان. سونداي-اق دوپينگكە قارسى ءبىلىم بەرۋ، كيبەرسپورت، سپورت جۋرناليستيكاسى جانە قۇتقارۋ سپورتى باعىتتارىندا جوبالار جۇزەگە اسىرىلعان.
بۇدان بولەك، وقۋ ورنىندا تالانتتى جاستاردى قولداۋعا ارنالعان گرانتتار قاراستىرىلعان. ولار وقۋ اقىسىن تولەۋدى، شاكىرتاقى الۋدى، جاتاقحانامەن قامتاماسىز ەتۋدى جانە شەتەلدە ءبىلىم الۋ مۇمكىندىكتەرىن قامتيدى.
نۇراسىل مەدەۋ ستۋدەنتتەر الدىنداعى بارلىق مىندەتتەمە، سونىڭ ىشىندە بۇرىن تاعايىندالعان گرانتتاردى قارجىلاندىرۋ دا تولىق ساقتالاتىنىن مالىمدەدى.
«قازاقستاننىڭ بولاشاعىنا وسىنداي ۇلەس قوسۋ مەن ءۇشىن ۇلكەن مارتەبە. ءبىز قۇرعاننىڭ بارلىعى جاستارعا، وتاندىق سپورتقا جانە ەلىمىزگە قىزمەت ەتۋى كەرەك»، – دەدى ۋنيۆەرسيتەت نەگىزىن قالاۋشى.
وقۋ ورنىن مەملەكەتكە وتەۋسىز بەرۋ باستاماسى سپورتتىق ءبىلىم بەرۋ جۇيەسىن دامىتۋعا، جاس مامانداردى دايارلاۋعا جانە سپورت عىلىمىن ىلگەرىلەتۋگە باعىتتالعان قادام رەتىندە باعالانىپ وتىر.
ايتا كەتەيىك، نۇراسىل مەدەۋ - قۇرىلتاي دەپۋتاتى دانا مەدەۋوۆانىڭ ۇلى.
