الماتىدا التى ەلدىڭ عالىمدارى عىلىمي كونسورتسيۋم قۇرۋ تۋرالى كەلىسىمگە قول قويدى، دەپ حابارلايدى “ادىرنا” ءتىلشىسى 24KZ-كە سىلتەپ.
كەلىسىمگە سايكەس، قازاقستان، تۇركيا، وزبەكستان، قىرعىزستان، ازەربايجان جانە موڭعوليا عالىمدارى بىرلەسكەن ارحەولوگيالىق ەكسپەديتسيالار ۇيىمداستىرىپ، التىن وردا مەن جوشى ۇلىسىنىڭ تاريحىن، قولجازبالارىن زەرتتەيدى جانە عىلىمي ەڭبەكتەر دايىندايدى.
سونداي-اق وسى تاقىرىپقا قاتىستى تاريحي ماتەريالداردى تسيفرلاندىرۋ جانە بىرىڭعاي تىزىلىمگە جيناقتاۋ جوسپارلانىپ وتىر. عىلىمي ىنتىماقتاستىق بەس جىلعا ەسەپتەلگەن.
قازاقستان ۇلتتىق عىلىم اكادەمياسىنىڭ پرەزيدەنتى اقىلبەك كۇرىشباەۆتىڭ ايتۋىنشا، تاريحي دەرەكتەردى تسيفرلىق فورماتتا بىرىكتىرۋ ماڭىزدى. وسى ماقساتتا قازاقستاندىق ماماندار قىتاي عالىمدارىمەن كەلىسسوز جۇرگىزىپ جاتىر. تاريحي ماتەريالداردى جۇيەلەۋ ءۇشىن فۋدان ۋنيۆەرسيتەتىندە ازىرلەنگەن تسيفرلىق ءمودۋلدى پايدالانۋ مۇمكىندىگى قاراستىرىلۋدا. سونىمەن قاتار گارۆارد ۋنيۆەرسيتەتىنىڭ پلاتفورماسى دا بالاما نۇسقا رەتىندە ۇسىنىلعان.
