مەملەكەتتىك تۋدى وزگەرتۋ تۋرالى پىكىرتالاس بارىسىندا قىرعىزستان پرەزيدەنتى سادىر جاپپاروۆ قازاقستاننىڭ ەكس-پرەزيدەنتى نۇرسۇلتان نازارباەۆتى ەسكە الدى، دەپ حابارلايدى «ادىرنا» ۇلتتىق پورتالى Qaz365.kz سايتىنا سىلتەمە جاساپ.
«قازاقستان پرەزيدەنتى 30 جىل ەل باسقاردى. الماتىدان ەلورداعا كوشىرەردە، پارلامەنتپەن وسى ماسەلەنى تالقىلادى. بۇعان دەپۋتاتتار قارسى بولىپ: «اقمولاعا كوشۋ دەگەن نەنى بىلدىرەدى»، «ايدالا» دەپ قارسى پىكىر ءبىلدىردى. سوندا نازارباەۆ مىنبەگە شىعىپ: «حالقىم، مەندە ءبىر وي بار. بۇگىن مەنىڭ تۋعان كۇنىم، ءبىر رەت ماقۇلداڭىزدار» دەدى. سوسىن قازاقستان پارلامەنتى ماقۇلداپ، 90-95 پايىزى قولدادى»، - دەدى جاپپاروۆ.
ونىڭ ايتۋىنشا، قازىرگى ەلوردا الەمدەگى ەڭ وزىق قالالاردىڭ بىرىنە اينالدى. «مەن بىشكەكتى كوشىرۋدى سۇرامايمىن، تىم بولماسا تۋدى وزگەرتۋگە قولداۋ كورسەتە الاسىز با؟ مەن ءسىزدىڭ وزگەرىستەرىڭىزدى قولدايمىن. ماعان دا قولداۋ كورسەتىڭىزدەرشى. تۋ اسا ءبىر وزگەرىسكە ۇشىرامايدى، ءبىز ونى ازداپ وزگەرتەمىز»، - دەيدى ول.
ايتا كەتەيىك، قىرعىزستان جوعارعى كەڭەسىنىڭ دەپۋتاتتارى مەملەكەتتىك تۋداعى كۇن ساۋلەسىنىڭ ءپىشىنىن وزگەرتۋدى ۇسىنىپ وتىر. وزگەرىستىڭ باستاماشىلارى – سپيكەر نۇرلانبەك شاكيەۆ پەن دەپۋتات ۇلان ءپىرىموۆ.
ولاردىڭ پايىمداۋىنشا، بۇگىنگى كۇنگە دەيىن قىرعىزستاننىڭ تۋىن «كۇنباعىس گۇلى رەتىندە قابىلدايتىندار بار، تۋ بەينەسىنىڭ ماعىناسىن ەكىۇشتى ءتۇسىندىرۋدى جويۋ ءۇشىن شارالار قابىلداۋ قاجەت. وسى سەبەپتى دەپۋتاتتار تولقىندى جولاقتاردى ءتۇزۋ ەتىپ وزگەرتىپ، كۇننىڭ شىنايى بەينەسىن كورسەتۋ كەرەكتىگىن ايتادى.
«ادىرنا» ۇلتتىق پورتالى
