وپەك+ ۇيىمىنا مۇشە جەتى ەل 2026 جىلدىڭ تامىزىندا مۇناي ءوندىرۋ كولەمىن تاۋلىگىنە 188 مىڭ باررەلگە ارتتىرۋ تۋرالى كەلىسىمگە كەلدى، دەپ حابارلايدى «ادىرنا» ءتىلشىسى.
ولاردىڭ قاتارىندا قازاقستان، ساۋد ارابياسى، رەسەي، يراك، كۋۆەيت، الجير جانە ومان بار.
بۇل شەشىم 2023 جىلدىڭ ساۋىرىندە ەنگىزىلگەن ەرىكتى وندىرىستىك شەكتەۋلەردەن كەزەڭ-كەزەڭىمەن باس تارتۋ اياسىنداعى كەزەكتى قادام بولماق.
جاريالانعان كەستەگە سايكەس، قازاقستاندا مۇناي ءوندىرۋ كولەمى تاۋلىگىنە 10 مىڭ باررەلگە ۇلعايتىلادى. وسىلايشا ەل ءۇشىن بەلگىلەنگەن ءوندىرىس دەڭگەيى تاۋلىگىنە 1,618 ميلليون باررەلدى قۇرايدى.
وپەك+ الداعى شەشىمدەر مۇناي نارىعىنداعى جاعدايعا بايلانىستى قابىلداناتىنىن اتاپ ءوتتى. قاجەت بولعان جاعدايدا ەلدەر ءوندىرىستى ارتتىرۋ قارقىنىن جەدەلدەتە الادى نەمەسە بۇل ۇدەرىستى ۋاقىتشا توقتاتىپ، ءتىپتى كەرى قايتارۋى مۇمكىن. سونداي-اق كەلىسىمگە قاتىسۋشى مەملەكەتتەر ءوز مىندەتتەمەلەرىن ورىنداۋدى جالعاستىرىپ، 2024 جىلدىڭ قاڭتارىنان بەرى كەلىسىلگەن كۆوتادان ارتىق وندىرىلگەن مۇناي كولەمىن وتەۋگە ۋاعدالاستى.
تاراپتار مۇناي نارىعىنداعى جاعدايدى باعالاۋ ءۇشىن اي سايىن كەزدەسۋلەر وتكىزۋ تۋرالى دا كەلىسىمگە كەلدى. وپەك+ ۇيىمىنىڭ كەلەسى وتىرىسى 2026 جىلعى 2 تامىزدا وتەدى.
