2001 جىلدىڭ 9 ناۋرىزىندا قازاقستان مەن رەسەي اراسىنداعى مەملەكەتتىك شەكارانى دەليميتاتسيالاۋ جونىندەگى ماڭىزدى جۇمىس باستالدى. بۇل پروتسەسس ەكى ەلدىڭ تاۋەلسىز مەملەكەتتەر رەتىندە ءوزارا شەكاراسىن ناقتىلاپ، حالىقارالىق قۇقىق تۇرعىسىنان راسىمدەۋگە باعىتتالدى.
كەلىسسوزدەر بارىسىندا قازاقستاندىق جانە رەسەيلىك ساراپشىلار مەملەكەتتىك شەكارانىڭ بىرقاتار ۋچاسكەلەرىن توپوگرافيالىق كارتالارعا ەنگىزىپ، ءوزارا كەلىسىمگە كەلگەن. اتاپ ايتقاندا، ۇزىندىعى 1896,5 شاقىرىم بولاتىن شەكارا بولىگى استراحان وبلىسى، ۆولگوگراد وبلىسى، ساراتوۆ وبلىسى جانە ورىنبور وبلىسى اۋماقتارى ارقىلى وتەتىن شەكارا سىزىعىنا قاتىستى جوبالار كەلىسىلىپ، كارتوگرافيالىق قۇجاتتارعا ەنگىزىلدى.
2001 جىل قازاقستان ءۇشىن تاريحي كەزەڭ بولدى. ەل تاۋەلسىزدىك العانىنا 10 جىل تولىپ، العاشقى اۋىر ەكونوميكالىق جانە ساياسي كەزەڭدەردى ەڭسەرىپ، تۇراقتى دامۋ جولىنا تۇسە باستاعان ۋاقىت ەدى. وسى جىلدارى قازاقستان كورشىلەس مەملەكەتتەردىڭ باسىم بولىگىمەن مەملەكەتتىك شەكاراسىن بەلگىلەۋ جۇمىستارىن اياقتادى.
قازاقستان مەن رەسەي اراسىنداعى مەملەكەتتىك شەكارانى دەليميتاتسيالاۋ جونىندەگى كەلىسسوزدەر 1999 جىلدىڭ قىركۇيەگىنەن 2005 جىلدىڭ قاڭتارىنا دەيىن جالعاستى. ناتيجەسىندە، 2005 جىلعى 18 قاڭتاردا ماسكەۋ قالاسىندا ەكى ەل باسشىلارى نۇرسۇلتان نازارباەۆ پەن ۆلاديمير پۋتين «قازاقستان–رەسەي مەملەكەتتىك شەكاراسى تۋرالى شارتقا» قول قويدى.
بۇل قۇجات قازاقستاننىڭ قۇرلىقتاعى شەكاراسىن تولىقتاي قۇقىقتىق تۇرعىدان راسىمدەۋدى اياقتاعان تاريحي كەلىسىم بولدى. اتالعان شارت 2006 جىلدىڭ 12 قاڭتارىندا كۇشىنە ەندى.
شەكارانى دەليميتاتسيالاۋ (ياعني كارتالاردا بەلگىلەۋ) اياقتالعاننان كەيىن كەلەسى كەزەڭ – دەماركاتسيا جۇمىستارى باستالدى.
قازاقستان مەن رەسەيدىڭ بىرلەسكەن مەملەكەتتىك شەكارانى دەماركاتسيالاۋ جونىندەگى كوميسسياسى 2007 جىلدىڭ شىلدە ايىندا ءوز قىزمەتىن باستادى. ال 2009 جىلدىڭ مامىرىندا تاراپتار مەملەكەتتىك شەكارا بويىندا ارنايى شەكارا بەلگىلەرىن ورناتۋ جۇمىستارىن قولعا الدى.
2001 جىلى قازاقستان تەك رەسەيمەن عانا ەمەس، باسقا كورشىلەس مەملەكەتتەرمەن دە شەكارا ماسەلەسىن شەشۋدە ماڭىزدى ناتيجەلەرگە قول جەتكىزدى. سول جىلى قازاقستان قىرعىزستان، وزبەكستان جانە تۇرىكمەنستان ەلدەرىمەن شەكارانى دەليميتاتسيالاۋ جونىندەگى كەلىسسوزدەردى تولىق اياقتادى.
سونىمەن قاتار قىتاي مەملەكەتىمەن شەكارانى دەماركاتسيالاۋ، ياعني شەكارا بەلگىلەرىن ورناتۋ جۇمىستارى دا اياقتالدى. ادەتتە جەر ماسەلەسىندە قاتاڭ ۇستانىمىمەن تانىلعان قىتايمەن شەكارانى تولىق بەكىتۋ قازاقستان ديپلوماتياسىنىڭ ماڭىزدى جەتىستىكتەرىنىڭ ءبىرى سانالدى.
