«بايتاق» جاسىلدار پارتياسىنىڭ توراعاسى ازاماتحان ءامىرتاي وزىنە قاتىستى تاراعان اقپاراتتىڭ جالعان ەكەنىن مالىمدەدى. ونىڭ حابارلاۋىنشا، ءوزىن ەشكىم دە "بايتاق" پارتياسىنىڭ قاتارىنان شىعارىپ جىبەرگەن جوق، مۇنىڭ جاي عانا قارا پيار ەكەنىن ايتتى، دەپ حابارلايدى "ادىرنا" ۇلتتىق پورتالى قازتاگ-قا سىلتەمە كورسەتە وتىرىپ.
"ەشقانداي دا شىندىققا جاناسپايدى. نيەتى تەرىستەردىڭ جازىپ جۇرگەنى. قارا پيار دا پياردىڭ ءبىر ءتۇرى. ءبىزدىڭ ارنايى جارعى بار، بارلىق پارتيا مۇشەلەرى مەنى توراعا رەتىندە قابىلدايدى، تەك توراعانىڭ عانا مۇنداي قۇقى بار. بۇل وڭاي پروتسەدۋرا ەمەس. ءبىز قازىر، كەرىسىنشە، ادامداردى قابىلدايمىز. سوڭعى اپتادا ءبىز پارتيانىڭ 2 مىڭ جاڭا مۇشەسىن قابىلدادىق. مەن بۇكىل قازاقستاندى ارالاپ، بەلسەندىلەرمەن كەزدەسىپ، ەكولوگيالىق جوبالارىمىزدى ىسكە قوسامىن. جۇمىس قارقىندى ءجۇرىپ جاتىر", - دەدى ازاماتحان ءامىرتاي.
ەسكە سالا كەتەيىك، «بايتاق» پارتياسى ناۋرىزدا وتكەن سايلاۋ ناتيجەسى بويىنشا شەكتىك داۋىس جيناي الماي، ماجىلىسكە وتە المادى. بۇعان دەيىن الەۋمەتتىك جەلىدە 45 جاستاعى ازاماتحان ءامىرتاي جاسىلدار پارتياسىنىڭ باسشىسى قىزمەتىنەن الىنىپ، "بايتاق"پارتياسىنىڭ قۇرامىنان شىعارىلعانى تۋرالى اقپارات تاراعان بولاتىن.
"ادىرنا" ۇلتتىق پورتالى
