قارا تەڭىزدە قازاق مۇنايىن تاسىمالدايتىن Chevron كومپانياسىنىڭ تانكەرىنە دروندار شابۋىل جاسادى. بۇل تۋرالى بۇگىن، 8 شىلدەدە Reuters اگەنتتىگى جازدى، دەپ حابارلايدى «ادىرنا» ءتىلشىسى.
دەرەككوزدەردىڭ ءبىرىنىڭ ايتۋىنشا، Yasa Polaris تانكەرى كاسپي قۇبىر كونسورتسيۋمى تەرمينالىنا جاقىنداعان كەزدە ۇشقىشسىز ۇشۋ اپپاراتىنىڭ سوققىسىنا ۇشىراعان.
اگەنتتىك مالىمەتىنشە، Chevron كومپانياسى وقيعانى راستاعانىمەن، ونىڭ كومپانيانىڭ وپەراتسيالىق قىزمەتى مەن ەكسپورتتىق جەتكىزىلىمدەرىنە اسەر ەتپەگەنىن مالىمدەگەن.
«ەكيپاج قاۋىپسىز جەردە، كەمەنىڭ جاعدايى قالىپتى. تانكەر قاۋىپسىز پورتقا باعىت الدى. ءبىز كەمە وپەراتورىمەن جانە قۇزىرلى ورگاندارمەن بايلانىسىپ جاتىرمىز»، – دەپ حابارلادى كومپانيا وكىلدەرى.
وقيعاعا قاتىستى پىكىر بىلدىرگەن رەسەي باسشىسى ۆلاديمير ءپۋتيننىڭ ءباسپاسوز حاتشىسىدميتري پەسكوۆ مۇنى حالىقارالىق ەنەرگەتيكالىق ينفراقۇرىلىمعا قارسى باعىتتالعان «كيەۆ رەجيمىنىڭ تەرروريستىك ارەكەتى» دەپ اتادى. رەسەيدىڭ بۇعان قالاي جاۋاپ بەرەتىنى تۋرالى سۇراققا پەسكوۆ ارنايى اسكەري وپەراتسيا جالعاساتىنىن ايتتى.
ايتا كەتەيىك، كقك ارقىلى قازاقستان مۇنايىنىڭ شامامەن 80 پايىزى ەكسپورتتالادى. قۇبىر جەلىسى قازاقستاننىڭ باتىسىنداعى تەڭىز كەن ورنى مەن وزگە دە كەن ورىندارىن نوۆوروسسيسك ماڭىنداعى تەڭىز تەرمينالىمەن بايلانىستىرادى. كقك اكتسيونەرلەرى قاتارىندا رەسەي (31%), قازاقستان (20,75%), Chevron (15%) جانە بىرقاتار جەكەمەنشىك كومپانيا بار.
