اقش اسكەرى سارسەنبى كۇنى كەشكە يرانعا قارسى جاڭا اۋە سوققىلارىن جاساعانىن مالىمدەدى. بۇل ەل پرەزيدەنتى دونالد ترامپتىڭ سوعىستى توقتاتۋ تۋرالى كەلىسىم مەرزىمى اياقتالدى دەپ سانايتىنىن ايتقاننان كەيىن بولدى، دەپ حابارلايدى «ادىرنا» ءتىلشىسى.
شابۋىلدار الماسۋى انكارادا وتەتىن ناتو ءسامميتى قارساڭىندا باستالدى. اسكەري شيەلەنىسكە يراننىڭ ورمۇز بۇعازىنداعى ساۋدا كەمەلەرىنە جاساعان شابۋىلدارى سەبەپ بولعان.
«باس قولباسشىنىڭ تاپسىرماسىمەن اقش ورتالىق قولباسشىلىعى يراننىڭ ورمۇز بۇعازىنداعى كەمە قاتىناسىنىڭ ەركىندىگىنە قاۋىپ ءتوندىرۋ مۇمكىندىگىن ودان ءارى السىرەتۋ ءۇشىن قوسىمشا سوققىلار جاساي باستادى»، – دەلىنگەن قولباسشىلىقتىڭ X الەۋمەتتىك جەلىسىندەگى حابارلاماسىندا.
ال اق ءۇي باسشىسى بۇل يراننىڭ كەمەلەردى بومبالاۋىنا بەرىلگەن جاۋاپ ەكەنىن جەتكىزدى.
«ەگەر مۇنداي ارەكەت قايتالانسا، سالدارى الدەقايدا اۋىر بولادى!» – دەپ جازدى ترامپ Truth Social جەلىسىندە.
اقش اسكەرى جاڭا سوققىلار تولقىنى اياقتالعانىن حابارلادى. مالىمەتكە سايكەس، شابۋىلدار اۋە قورعانىسى جۇيەلەرىنە، زىمىران جانە درون قويمالارىنا، اسكەري-تەڭىز نىساندارىنا جانە يران جاعالاۋى بويىنداعى لوگيستيكالىق ينفراقۇرىلىمعا تيەسىلى جالپى 90 نىسانعا باعىتتالعان.
يراننىڭ IRNA مەملەكەتتىك اقپارات اگەنتتىگى ورمۇز بۇعازى ماڭىنداعى بىرنەشە قالادا، سونىڭ ىشىندە ەلدىڭ ەڭ ءىرى پورتى ورنالاسقان بەندەر-ابباس قالاسىندا جارىلىستار بولعانىن حابارلادى. بۇل قالادا يران اسكەري-تەڭىز كۇشتەرى مەن يسلام رەۆوليۋتسياسى ساقشىلارى كورپۋسىنىڭ ماڭىزدى نىساندارى ورنالاسقان.
شابۋىلدار چاباحار، كوناراك جانە سيريك قالالارىن، سونداي-اق لاۆان ارالىن دا قامتىعان. چاباحاردىڭ كەيبىر اۋداندارىندا ەلەكتر ەنەرگياسى وشكەن. IRIB مەملەكەتتىك تەلەارناسىنىڭ مالىمەتىنشە، قالاداعى ەكى ايلاق پەن تەڭىز ديسپەتچەرلىك مۇناراسى شابۋىلعا ۇشىراعان.
Press TV تەلەارناسى يراننىڭ وڭتۇستىك-شىعىسىنداعى يرانشاحر قالاسىنىڭ اۋەجايىنداعى تەرمينال عيماراتى مەن ۇشۋ-قونۋ جولاعىندا جارىلىستار بولعانىن حابارلادى. IRNA مالىمەتىنشە، اۋەجايدا ءبىر ءورت ءسوندىرۋشى قازا تاۋىپ، اۋە قوزعالىسىن باسقارۋ عيماراتى مەن مەتەورولوگيالىق ستانسا زاقىمدانعان.
Tasnim اگەنتتىگىنىڭ حابارلاۋىنشا، ەلدىڭ سولتۇستىگىندە تەمىرجول كوپىرى زاقىمدالعان. ال Fars اگەنتتىگى بۋشەر قالاسىندا دا جارىلىستار ەستىلگەنىن مالىمدەدى. بۇل پورتتى قالادا رەسەيدىڭ قاتىسۋىمەن سالىنعان اتوم ەلەكتر ستانساسى ورنالاسقان. يراننىڭ جوعارى ۇلتتىق قاۋىپسىزدىك كەڭەسىنە جاقىن Nournews اگەنتتىگى ستانسانىڭ زارداپ شەكپەگەنىن حابارلادى.
