يران Iran International تەلەارناسىمەن ىنتىماقتاستىقتى جالعاستىراتىن ەلدەر مەن ۇيىمداردى اسكەري نىسانالار تىزىمىنە ەنگىزۋى مۇمكىن ەكەنىن مالىمدەدى، دەپ حابارلايدى “ادىرنا” ۇلتتىق پورتالى.
Iran International — تاۋەلسىز سپۋتنيكتىك ارنا.
ارنانىڭ مالىمەتىنشە، ءتيىستى ەسكەرتۋ يراننىڭ مەملەكەتتىك اقپارات قۇرالدارىندا جاريالانعان. وندا قارۋلى كۇشتەردىڭ «حاتام ءال-انبيا» قولباسشىلىعىنىڭ وكىلى Iran International-دى «جالعان اقپارات تاراتىپ، پسيحولوگيالىق سوعىس جۇرگىزىپ وتىر» دەپ ايىپتاعان.
«ەگەر بۇل باق-قا قولداۋ كورسەتۋ جالعاسسا، ونىمەن ىنتىماقتاساتىن تاراپتار يران يسلام رەسپۋبليكاسىنىڭ نىسانالار تىزىمىنە ەنگىزىلەدى»، — دەلىنگەن مالىمدەمەدە.
Iran International ۇلىبريتانيا اۋماعىنان حابار تاراتادى جانە تۇركىمەنستانعا تيەسىلى TürkmenÄlem 52E/MonacoSat سپۋتنيگىن پايدالانادى. بۇل سپۋتنيك ارقىلى باسقا دا ونداعان تەلە جانە راديوكانالدار ەفيرگە شىعادى.
تەلەارنا حابارلاۋىنشا، بۇعان دەيىن تۇركىمەنستان مەن موناكوعا تىكەلەي ەسكەرتۋلەر جاسالعان. اتالعان ەلدەردىڭ اۋماعىندا حابار تاراتۋ ينفراقۇرىلىمى ورنالاسقان.
سونىمەن قاتار تەگەران رۋمىنياعا دا ەسكەرتۋ جاساپ، ەگەر ەل ءوز اۋماعىنداعى بازالاردى اقش-تىڭ يرانعا قارسى وپەراتسيالارى ءۇشىن پايدالانۋعا رۇقسات بەرسە، قاقتىعىسقا قاتىسۋشى تاراپ رەتىندە قاراستىرىلاتىنىن جەتكىزگەن.
ايتا كەتەيىك، 11 ناۋرىزدا رۋمىنيا پارلامەنتى ەل اۋماعىنا قوسىمشا امەريكالىق اسكەري بولىمدەر مەن اۆياتسيا ورنالاستىرۋ تۋرالى ۇسىنىستى ماقۇلداعان.
