ۋحنااگين حۇرەلسۇح
موڭعوليا پرەمەر-ءمينيسترى نيام-وسورىن 18 قاراشادا ۋچرال ۇكىمەت جۇمىسى شتاتتىق رەجيمدە جالعاساتىنىن ايتتى، دەپ حابارلايدى “ادىرنا”.
وسى جاعدايدا پرەمەر ۇكىمەت اپپاراتىنىڭ باسشىسى ب.ەنحبايار مەن ادىلەت ءمينيسترىنىڭ ورىنباسارى د.مۋنح-ەردەنە ءوز وتىنىشتەرى بويىنشا قىزمەتتەرىنەن كەتكەنىن حابارلادى.
ايتۋىنشا، قورعانىس مينيسترلىگىندەگى جاعدايعا قاتىستى شەشىم وزگەشە بولدى. ءمينيستردىڭ وتستاۆكاسى قارالماعان. ال ەل پرەزيدەنتى ءارى قارۋلى كۇشتەردىڭ جوعارعى باس قولباسشىسى ۋ.حۇرەلسۇح ءوز وكىلەتتىگىن توقتاتۋ تۋرالى ءوتىنىش بەرگەن. بيلىك ۆاكۋمىنىڭ الدىن الۋ ماقساتىندا قورعانىس مينيسترلىگى مەملەكەتتىك حاتشىسىنىڭ وكىلەتتىك مەرزىمى ۇزارتىلدى. پرەمەر-مينيستر پرەزيدەنتتىڭ بۇل شەشىمىن قولداپ، ونى ەل الدىنداعى بەدەلىن قالپىنا كەلتىرۋگە باعىتتالعان قادام دەپ باعالادى.
ۇكىمەت باسشىسى مەملەكەتتىك مۇلىكتى جىمقىرۋعا قاتىستى اتى اتالعان بارلىق لاۋازىمدى تۇلعانىڭ قىزمەتىنە جان-جاقتى تەكسەرۋ جۇرگىزىلەتىنىن ايتتى. قۇقىق قورعاۋ ورگاندارىنا قىزمەتىنەن كەتكەن ازاماتتاردىڭ ارەكەتتەرىن زاڭ اياسىندا تەرگەۋ تاپسىرىلعان. سونداي-اق ن.ۋچرال تەمىرجول قۇرىلىسى مەن وعان قاتىستى كەلىسىمشارت توڭىرەگىندەگى داۋعا بۇرىنعى پرەزيدەنت ح.باتتۋلگانى جاۋاپتى دەپ سانايتىنىن جەتكىزدى.
بۇدان بولەك، موڭعوليادا كەزەكتى پرەزيدەنت سايلاۋىنىڭ وتەتىن كۇنى 20 جەلتوقسانعا دەيىن بەلگىلەنەدى. موڭعول حالىق پارتياسىنىڭ توراعاسى رەتىندە ن.ۋچرال پارتيا ىشىندە قارجىلىق جانە ۇيىمداستىرۋشىلىق اۋديت جۇرگىزىلەتىنىن جاريالادى. ول وزگە ساياسي كۇشتەردى دە اشىقتىققا شاقىردى. سونىمەن قاتار دەموكراتيالىق پارتيامەن بىرلەسىپ بيلىك جۇرگىزۋ تۋرالى اقپاراتتى جوققا شىعاردى.
بۇدان الدىن موڭعوليا پرەزيدەنتى ۋحنااگين حۇرەلسۇح ءوز بەدەلىن قالپىنا كەلتىرۋ ماقساتىندا پرەزيدەنتتىك وكىلەتتىگىنەن باس تارتۋعا نيەتتى ەكەنىن مالىمدەگەن. وعان دەيىن موڭعوليا دەموكراتيالىق پارتياسىنىڭ پارلامەنتتىك فراكتسياسى ونى وتستاۆكاعا كەتۋگە شاقىرىپ، ءىستىڭ اق-قاراسىن انىقتاۋدى تالاپ ەتكەن. «مەن بۇل تالاپتى قولدايمىن. موڭعوليا پرەزيدەنتى رەتىندەگى وكىلەتتىگىمدى تاپسىرامىن. ماعان قاتىستى تەرگەۋ جۇرگىزىلىپ، ابىرويىم قالپىنا كەلتىرىلەدى»، - دەگەن. ايىپتاۋلار تاۆان-تولگوي – گاشۋنسۋحايت تەمىرجولىن سالۋعا ارنالعان قۇپيا تەندەرمەن بايلانىستى. اتالعان تەندەردىڭ جەڭىمپازى Bodi Group كومپانياسى بولعان. بولجام بويىنشا، كەيبىر ساياساتكەرلەر جالپى سوماسى 110 ميلليون دوللار بولاتىن پارا الۋى مۇمكىن.
18 قاراشادا ەل پارلامەنتى - مەملەكەتتىك ۇلى حۋرالدىڭ ءتيىستى كوميتەتىنىڭ وتىرىسىندا پرەزيدەنت وكىلەتتىگىن مەرزىمىنەن بۇرىن توقتاتۋ ماسەلەسى تالقىلاندى. جيىنعا قاتىسقانداردىڭ 77 پايىزى حۇرەلسۇحتىڭ دوعارىسىن قولداپ داۋىس بەردى. بۇل ماسەلە بويىنشا سوڭعى شەشىم بەيسەنبى كۇنى، پارلامەنتتىڭ جالپى وتىرىسىندا قابىلدانادى.
ۋحنااگين حۇرەلسۇح 2021 جىلدىڭ 25 ماۋسىمىنان بەرى موڭعوليا پرەزيدەنتى قىزمەتىن اتقارىپ كەلگەن. ول 2017–2021 جىلدارى ەل ۇكىمەتىن باسقارعان.
