استانا حالىقارالىق قارجى ورتالىعىنىڭ سوتى «گازپرومنان» ۋكراينالىق «نافتوگاز» كومپانياسىنىڭ پايداسىنا 1,4 ملرد دوللار ءوندىرىپ الۋ تۋرالى بۇرىن شىعارىلعان شەشىمنىڭ كۇشىن جويدى، دەپ حابارلايدى «ادىرنا» ءتىلشىسى.
اكتيۆتەرگە تىيىم سالۋ تۋرالى باستاپقى شەشىمدى 2026 جىلدىڭ مامىرىندا بريتاندىق سۋديا ەندريۋ سپينك شىعارعان بولاتىن. الايدا جاڭا شەشىمىندە سۋديا لورد فولكس احقو سوتى تەك ءۇش ساناتتاعى داۋلاردى قاراي الاتىنىن اتاپ ءوتتى. ولار – ورتالىققا قاتىسۋشىلار اراسىنداعى داۋلار، ورتالىق اۋماعىندا جاسالعان وپەراتسيالارعا قاتىستى ىستەر جانە تاراپتار ءوزارا كەلىسىممەن ونىڭ قاراۋىنا بەرگەن داۋلار. ال «نافتوگاز» بەن «گازپروم» اراسىنداعى داۋ بۇل تالاپتاردىڭ ەشقايسىسىنا سايكەس كەلمەيتىنى ايتىلدى.
ەكى كومپانيا اراسىنداعى جانجال 2019 جىلى رەسەي گازىن ۋكراينا اۋماعى ارقىلى تاسىمالداۋدى ۇيىمداستىرۋ جونىندەگى كەلىسىمشارتتان تۋىنداعان. 2022 جىلدىڭ مامىرىندا ۋكرايناداعى سوعىس سالدارىنان «سوحرانوۆكا» ستانتسياسى ارقىلى ترانزيت قيىنداپ، كەيىن جەتكىزىلىمدەر «سۋدجا» بەكەتى ارقىلى جالعاسقان.
«نافتوگازدىڭ» مالىمدەۋىنشە، بالاما باعىت جۇمىس ىستەپ تۇرعانىنا قاراماستان، «گازپروم» ترانزيت قىزمەتتەرى ءۇشىن تولەمدى تولىق كولەمدە تولەۋدەن باس تارتقان. بۇل جاعداي اربيتراجعا جۇگىنۋگە نەگىز بولعان.
2025 جىلدىڭ ماۋسىمىندا اربيتراجدىق تريبۋنال «گازپرومدى» جاۋاپتى دەپ تانىپ، كومپانيانى بەرەشەكتى، پايىزداردى جانە سوت شىعىندارىن تولەۋگە مىندەتتەدى. ال 2026 جىلدىڭ قاڭتارىندا شۆەيتساريانىڭ فەدەرالدىق تريبۋنالى «گازپرومنىڭ» بۇل شەشىمگە شاعىمدانۋ ارەكەتىن قاناعاتتاندىرمادى.
وسىدان كەيىن «نافتوگاز» ءارتۇرلى يۋريسديكتسيالاردا «گازپرومنىڭ» اكتيۆتەرىن ءوندىرىپ الۋعا كىرىستى. قازاقستان دا وسى ناۋقان جۇرگىزىلگەن ەلدەردىڭ ءبىرى بولدى. الايدا استانا حالىقارالىق قارجى ورتالىعىنىڭ سوتى اقىر سوڭىندا مۇنداي تالاپتى قاراۋعا وكىلەتتىگى جوق ەكەنىن مالىمدەدى.
