قازاقستاندىقتاردىڭ باسىم بولىگى ءوز ومىرىنە قاناعاتتاناتىنىن جانە الداعى ۋاقىتتا تۇرمىس جاعدايىنىڭ جاقساراتىنىنا سەنەتىنىن ايتتى. بۇل DATAmetrics كومپانياسى جۇرگىزگەن الەۋمەتتانۋلىق زەرتتەۋ ناتيجەسىندە بەلگىلى بولدى.
زەرتتەۋ قازاقستان رەسپۋبليكاسى پرەزيدەنتى جانىنداعى قازاقستاننىڭ ستراتەگيالىق زەرتتەۋلەر ينستيتۋتىنىڭ تاپسىرىسى بويىنشا 2026 جىلعى 13 ماۋسىم مەن 2 شىلدە ارالىعىندا جۇرگىزىلگەن.
ساۋالناماعا ەلىمىزدىڭ بارلىق وڭىرىنەن، سونداي-اق استانا، الماتى جانە شىمكەنت قالالارىنان 18 جاستان اسقان 8 مىڭ ادام قاتىستى.
زەرتتەۋ ناتيجەسىنە سايكەس، رەسپوندەنتتەردىڭ 63,3%-ى ءوز ومىرىنە تولىق ريزا ەكەنىن ايتسا، 31,9%-ى كوپ جاعدايدا قاناعاتتاناتىنىن جەتكىزگەن. وسىلايشا، قاتىسۋشىلاردىڭ 95,2%-ى ءوز ومىرىنە وڭ باعا بەرگەن.
سونىمەن قاتار ساۋالناماعا قاتىسقانداردىڭ 67,6%-ى سوڭعى ءبىر جىلدا وتباسىنىڭ ماتەريالدىق جاعدايى جاقسارعانىن اتاپ وتكەن. ونىڭ ىشىندە 29,8%-ى جاعدايىنىڭ ايتارلىقتاي جاقسارعانىن، ال 37,8%-ى بەلگىلى ءبىر دەڭگەيدە وڭ وزگەرىستەر بولعانىن ايتقان.
ال 25,5% رەسپوندەنت وتباسىنىڭ ماتەريالدىق جاعدايى وزگەرمەگەنىن مالىمدەسە، 6,6%-ى تۇرمىس دەڭگەيىنىڭ ناشارلاعانىن كورسەتكەن.
زەرتتەۋ ناتيجەسى قازاقستاندىقتاردىڭ بولاشاققا دەگەن سەنىمى دە جوعارى ەكەنىن كورسەتتى. ساۋالناماعا قاتىسقانداردىڭ 78,6%-ى ءبىر جىلدان كەيىن ءوز وتباسىنىڭ تۇرمىس جاعدايى بۇگىنگىدەن جاقسى بولادى دەپ ەسەپتەيدى. ونىڭ ىشىندە 45%-ى جاعدايى ايتارلىقتاي جاقسارادى دەپ سەنسە، 33,6%-ى بەلگىلى ءبىر دەڭگەيدە جاقساراتىنىن ايتقان.
زەرتتەۋ بەتپە-بەت سۇحبات جۇرگىزۋ ادىسىمەن ۇيىمداستىرىلعان. ىرىكتەۋ رەسپۋبليكا حالقىنىڭ جىنىسى، جاسى جانە قالا مەن اۋىلداعى تۇرعىندار ۇلەسىنە سايكەس جاسالعان. زەرتتەۋدىڭ ستاتيستيكالىق قاتەلىك شەگى ±1,1%، سەنىمدىلىك دەڭگەيى – 95%.
