13 شىلدەدە موڭعوليانىڭ ءحۇي دولوون حۋداگ جەرىندە بىرىككەن ۇلتتار ۇيىمى بەكىتكەن دۇنيەجۇزىلىك جىلقى كۇنىنە ارنالعان العاشقى حالىقارالىق سالتاناتتى ءىس-شارا ءوتتى.
ءىس-شارانىڭ اشىلۋىندا موڭعوليا پرەزيدەنتى ۋحنااگين حۇرەلسۇح ءسوز سويلەپ، جىلقىنىڭ ادامزات وركەنيەتى مەن كوشپەلى مادەنيەتتىڭ دامۋىنداعى ەرەكشە ورنىنا توقتالدى.
پرەزيدەنتتىڭ ايتۋىنشا، موڭعول حالقىنىڭ تاريحى مەن مادەنيەتى جىلقىمەن تىعىز بايلانىستى. ول موڭعول جىلقىسىن ۇلتتىق مۇرانىڭ اجىراماس بولىگى ءارى مەملەكەتتىلىكتىڭ ماڭىزدى سيمۆولى رەتىندە باعالادى.
مەملەكەت باسشىسى قازىرگى تاڭدا الەمدە 60 ميلليوننان استام جىلقى بار ەكەنىن، ونىڭ 5 ميلليوننان استامى موڭعوليادا وسىرىلەتىنىن ايتتى. سونداي-اق موڭعوليا جىلقى سانى بويىنشا الەمدە ءتورتىنشى، ال جان باسىنا شاققانداعى كورسەتكىش بويىنشا ءبىرىنشى ورىندا تۇرعانىن اتاپ ءوتتى.
ۋحنااگين حۇرەلسۇحتىڭ سوزىنشە، دۇنيەجۇزىلىك جىلقى كۇنىن بەلگىلەۋ تۋرالى باستاما جىلقىعا قاتىستى مادەني مۇرانى ساقتاۋ، زەرتتەۋ، دامىتۋ جانە حالىقارالىق دەڭگەيدە ناسيحاتتاۋ ماقساتىندا كوتەرىلگەن. بۇل باستامانى بۇۇ باس اسسامبلەياسى قولداپ، ەندى مەرەكە جىل سايىن ناادام ۇلتتىق مەرەكەسى اياسىندا اتالىپ وتەتىن بولادى.
پرەزيدەنت دۇنيەجۇزىلىك جىلقى كۇنى جىلقى شارۋاشىلىعىنىڭ ەكونوميكالىق جانە الەۋمەتتىك ماڭىزىن ارتتىرۋعا، عىلىمي زەرتتەۋلەردى دامىتۋعا، مادەني مۇرانى ساقتاۋعا جانە حالىقارالىق ىنتىماقتاستىقتى نىعايتۋعا ىقپال ەتەتىنىن ايتتى.
ول سونداي-اق موڭعول حالقىنىڭ جىلقى مادەنيەتىنىڭ ماڭىزدى بولىگى سانالاتىن جۇيرىك ات جارىسىنا توقتالىپ، ونىڭ ناادام مەرەكەسىنىڭ اجىراماس بولىگى ءارى ادامزاتتىڭ ماتەريالدىق ەمەس مادەني مۇراسىنىڭ قۇرامىنا ەنەتىن ءداستۇر ەكەنىن اتاپ ءوتتى.
دۇنيەجۇزىلىك جىلقى كۇنى اياسىندا العاش رەت موڭعوليا پرەزيدەنتىنىڭ جۇلدەسىنە ارنالعان حالىقارالىق ات جارىسى ۇيىمداستىرىلدى. سونىمەن قاتار، ەلدىڭ ءار وڭىرىنەن كەلگەن سالت اتتىلاردىڭ قاتىسۋىمەن سالتاناتتى شەرۋ ءوتتى.
ءسوز سوڭىندا موڭعوليا پرەزيدەنتى دۇنيەجۇزىلىك جىلقى كۇنىنىڭ الەم ەلدەرى اراسىنداعى مادەني بايلانىستاردى نىعايتۋعا، جىلقى مۇراسىن ساقتاۋ مەن دارىپتەۋگە ىقپال ەتەتىنىنە سەنىم ءبىلدىرىپ، جىلقىنى ادامزاتتىڭ سەنىمدى سەرىگى رەتىندە قاستەرلەيتىن بارلىق حالىقتى مەرەكەمەن قۇتتىقتادى.
