13 şıldede Moŋǧoliianyŋ Hüi doloon hudag jerınde Bırıkken Ūlttar Ūiymy bekıtken Düniejüzılık jylqy künıne arnalǧan alǧaşqy halyqaralyq saltanatty ıs-şara öttı.
Is-şaranyŋ aşyluynda Moŋǧoliia prezidentı Uhnaagiin Hürelsüh söz söilep, jylqynyŋ adamzat örkenietı men köşpelı mädeniettıŋ damuyndaǧy erekşe ornyna toqtaldy.
Prezidenttıŋ aituynşa, moŋǧol halqynyŋ tarihy men mädenietı jylqymen tyǧyz bailanysty. Ol moŋǧol jylqysyn ūlttyq mūranyŋ ajyramas bölıgı ärı memlekettılıktıŋ maŋyzdy simvoly retınde baǧalady.
Memleket basşysy qazırgı taŋda älemde 60 millionnan astam jylqy bar ekenın, onyŋ 5 millionnan astamy Moŋǧoliiada ösırıletının aitty. Sondai-aq Moŋǧoliia jylqy sany boiynşa älemde törtınşı, al jan basyna şaqqandaǧy körsetkış boiynşa bırınşı orynda tūrǧanyn atap öttı.
Uhnaagiin Hürelsühtıŋ sözınşe, Düniejüzılık jylqy künın belgıleu turaly bastama jylqyǧa qatysty mädeni mūrany saqtau, zertteu, damytu jäne halyqaralyq deŋgeide nasihattau maqsatynda köterılgen. Būl bastamany BŪŪ Bas Assambleiasy qoldap, endı mereke jyl saiyn Naadam ūlttyq merekesı aiasynda atalyp ötetın bolady.
Prezident Düniejüzılık jylqy künı jylqy şaruaşylyǧynyŋ ekonomikalyq jäne äleumettık maŋyzyn arttyruǧa, ǧylymi zertteulerdı damytuǧa, mädeni mūrany saqtauǧa jäne halyqaralyq yntymaqtastyqty nyǧaituǧa yqpal etetının aitty.
Ol sondai-aq moŋǧol halqynyŋ jylqy mädenietınıŋ maŋyzdy bölıgı sanalatyn jüirık at jarysyna toqtalyp, onyŋ Naadam merekesınıŋ ajyramas bölıgı ärı adamzattyŋ materialdyq emes mädeni mūrasynyŋ qūramyna enetın dästür ekenın atap öttı.
Düniejüzılık jylqy künı aiasynda alǧaş ret Moŋǧoliia prezidentınıŋ jüldesıne arnalǧan halyqaralyq at jarysy ūiymdastyryldy. Sonymen qatar, eldıŋ är öŋırınen kelgen salt attylardyŋ qatysuymen saltanatty şeru öttı.
Söz soŋynda Moŋǧoliia prezidentı Düniejüzılık jylqy künınıŋ älem elderı arasyndaǧy mädeni bailanystardy nyǧaituǧa, jylqy mūrasyn saqtau men därıpteuge yqpal etetınıne senım bıldırıp, jylqyny adamzattyŋ senımdı serıgı retınde qasterleitın barlyq halyqty merekemen qūttyqtady.
