الماتى وبلىستىق سوتى بولات نازارباەۆتىڭ ۇلى نۇربول نازارباەۆتىڭ ءوزىن بانكروت دەپ تانۋ جانە تولەم قابىلەتتىلىگىن قالپىنا كەلتىرۋ تۋرالى تالابىن قاناعاتتاندىرماي، ءبىرىنشى ساتىداعى سوتتىڭ شەشىمىن وزگەرىسسىز قالدىردى، دەپ حابارلايدى "ادىرنا".
نۇربول نازارباەۆ اپەللياتسيالىق شاعىمىندا وزىنە قاتىستى شىعارىلعان شەشىمنىڭ كۇشىن جويۋدى سۇراپ، مەملەكەت پەن جەكە كومپانيا الدىنداعى ءىرى كولەمدەگى بەرەشەگىن وتەۋگە مۇمكىندىگى جوعىن العا تارتقان. ونىڭ مالىمەتىنشە، اكتيۆتەردى قايتارۋ جونىندەگى كوميتەت الدىنداعى قارىزى 55,8 ميلليارد تەڭگەدەن اسادى. بۇدان بولەك، ءوسىمپۇل، مەملەكەتتىك باج سالىعى جانە "اقتوبە" وندىرىستىك كومپانياسى" جشس الدىنداعى بەرەشەگى بار.
شاعىمىندا ول وزىنە تيەسىلى قۇندى اكتيۆتەردىڭ بولعانىن، الايدا ولاردىڭ ءوز اتىنا راسىمدەلمەگەنىن مالىمدەگەن. نازارباەۆ بۇل مۇلىكتەرگە بەنەفيتسيارلىق يەلىك ەتۋ جانە سەرىكتەستىك قاتىناستار ارقىلى باقىلاۋ جاسايتىنىن ايتىپ، سەرىكتەستەرى ونىڭ قارىزدارىن وتەۋگە كومەكتەسۋگە دايىن ەكەنىن جەتكىزگەن. وسى نەگىزدە ول سوتتان تولەم قابىلەتتىلىگىن قالپىنا كەلتىرۋ ءراسىمىن قولدانۋدى سۇرادى.
الايدا پروكۋراتۋرا بۇل ارەكەتتى زاڭدى ورىنداۋدى سوزبالاڭعا سالۋ امالى دەپ باعالادى. قاداعالاۋ ورگانىنىڭ پىكىرىنشە، بورىشكەر بۇعان دەيىن دە ءدال وسىنداي تالاپپەن سوتقا جۇگىنگەن جانە ناقتى جاعداي وزگەرمەگەنىنە قاراماستان قايتا ءوتىنىش بەرۋى مەملەكەت پايداسىنا شىعارىلعان سوت شەشىمدەرىنىڭ ورىندالۋىن كەيىنگە قالدىرۋعا باعىتتالعان.
اپەللياتسيالىق سوت تا ءبىرىنشى ساتىداعى سوتتىڭ تۇجىرىمىمەن كەلىستى. سوت القاسىنىڭ پىكىرىنشە، نازارباەۆ ءوزىنىڭ ناقتى قارجىلىق جاعدايى تۋرالى تولىق اقپارات ۇسىنباعان. ءىس ماتەريالدارىندا ونىڭ كوممەرتسيالىق نىسانداردى جالعا بەرۋدەن تۇسەتىن تابىسى، ديۆيدەندتەرى، دەپوزيتتىك كىرىستەرى، سونداي-اق وتباسى جاعدايى مەن كۇندەلىكتى شىعىندارى جونىندە مالىمەتتەر جوق.
سوتتىڭ اتاپ وتۋىنشە، مۇنداي دەرەكتەرسىز بورىشكەردىڭ تولەم قابىلەتىن باعالاۋ جانە قارىزداردى وتەۋدىڭ ءادىل جوسپارىن جاساۋ مۇمكىن ەمەس.
سونىمەن قاتار سوت نازارباەۆتىڭ قارجىلىق جاعدايىن اشىق كورسەتپەگەنىن، جۇمىس ىستەۋگە كەدەرگى كەلتىرەتىن زاڭدى سەبەپتەردى دالەلدەمەگەنىن جانە كرەديتورلار الدىنداعى مىندەتتەمەلەرىن ءوز ەركىمەن ورىنداۋعا باعىتتالعان ناقتى ارەكەتتەر جاساماعانىن اتاپ ءوتتى.
ناتيجەسىندە الماتى وبلىسى قاراساي اۋداندىق سوتىنىڭ بۇعان دەيىنگى شەشىمى وزگەرىسسىز قالدىرىلىپ، نۇربول نازارباەۆتىڭ اپەللياتسيالىق شاعىمى قاناعاتتاندىرىلمادى.
قازاقستان زاڭناماسىنا سايكەس، تولەم قابىلەتتىلىگىن قالپىنا كەلتىرۋ ءراسىمى – بورىشكەردى بىردەن بانكروت دەپ تانىماي، قارىزدارىن بەلگىلى ءبىر مەرزىم ىشىندە وتەۋگە مۇمكىندىك بەرەتىن قۇقىقتىق تەتىك. بۇل ءراسىم قولدانىلعان جاعدايدا ازامات بانكروت مارتەبەسىن المايدى جانە وعان بانكروتتىققا ءتان بىرقاتار شەكتەۋلەر قولدانىلمايدى. سونىمەن قاتار ايىپپۇلدار مەن ءوسىمپۇلداردىڭ ەسەپتەلۋى توقتاتىلىپ، قارىزدى بەس جىلعا دەيىن ءبولىپ تولەۋ جوسپارى بەكىتىلۋى مۇمكىن.
قازىرگى تاڭدا نۇربول نازارباەۆقا قاتىستى كەمىندە ەكى اتقارۋشىلىق ءىس جۇرگىزىلىپ جاتىر. ونىڭ مەملەكەت الدىنداعى جالپى بەرەشەگى شامامەن 63,7 ميلليارد تەڭگەنى قۇرايدى.
بۇل سومانىڭ نەگىزگى بولىگى – اكتيۆتەردى مەملەكەتكە قايتارۋ جونىندەگى تالاپتار. ونىڭ اياسىندا 55 ميلليارد تەڭگە ارنايى مەملەكەتتىك قورعا اۋدارىلۋى ءتيىس. بۇدان بولەك، وعان 1,6 ميلليارد تەڭگەدەن استام مەملەكەتتىك باج سالىعى ەسەپتەلگەن.
نۇربول نازارباەۆ – مارقۇم بولات نازارباەۆتىڭ ۇلى، قازاقستاننىڭ تۇڭعىش پرەزيدەنتى نۇرسۇلتان نازارباەۆتىڭ نەمەرە ءىنىسى.
2017 جىلعا دەيىن قۇقىق قورعاۋ ورگاندارىندا قىزمەت اتقارىپ، الماتى وبلىستىق ىشكى ىستەر دەپارتامەنتى باستىعىنىڭ ورىنباسارى قىزمەتىنە دەيىن كوتەرىلگەن. كەيىن بيزنەس سالاسىنا اۋىسىپ، Prime Capital Invest, Prime Capital Holding سەكىلدى كومپانيالارمەن بايلانىستى كاسىپكەر رەتىندە تانىلدى.
ول سوڭعى جىلدارى قازاقستاننىڭ ەڭ اۋقاتتى كاسىپكەرلەرى رەيتينگىندە تۇراقتى تۇردە اتالىپ كەلدى. بۇعان دەيىن ونىڭ جەكە كاپيتالى شامامەن 179 ميلليون دوللار دەپ باعالانعان.
