بۇگىن، 22 شىلدەدە قر عىلىم جانە جوعارى ءبىلىم مينيسترلىگىندە (عجبم) نەگىزگى ۇلتتىق بىرىڭعاي تەستىلەۋ (ۇبت) كەزىندە شەكتى بالل جيناي الماي قالعان تالاپكەرلەر ءۇشىن جاعىمدى جاڭالىقپەن ءبولىستى، دەپ حابارلايدى "ادىرنا".
ەلىمىزدە جوعارى وقۋ ورنىنا تۇسكىسى كەلەتىندەرگە تاعى ءبىر مۇمكىندىك بەرىلدى، ولار تامىز ۇبت-سىن تاپسىرا الادى.
"25 شىلدەدە تامىز ايىنداعى ۇلتتىق بىرىڭعاي تەستىلەۋگە (ۇبت) قاتىسۋعا ءوتىنىش قابىلداۋ باستالىپ، 5 تامىزعا دەيىن جالعاسادى. ءوتىنىشتى ۇلتتىق تەستىلەۋ ورتالىعىنىڭ app.testcenter.kz سايتى نەمەسە UTO.kz ءموبيلدى قوسىمشاسى ارقىلى بەرۋگە بولادى. تەستىلەۋدىڭ ءوزى 10-15 تامىز ارالىعىندا وتەدى", – دەلىنگەن عىلىم جانە جوعارى ءبىلىم مينيسترلىگىنىڭ حابارلاماسىندا.
تامىز ۇبت-سى جوعارى وقۋ ورنىنا اقىلى نەگىزدە ءتۇسۋ ءۇشىن تەستىلەۋدى قايتا تاپسىرۋعا نيەتتى تالاپكەرلەرگە ارنالعان.
"الدىڭعى ۇبت-لاردا شەكتى بالل جيناي الماعان تالاپكەرلەرگە تەستىلەۋدەن قايتا ءوتۋ مۇمكىندىگى بەرىلەدى. سونىمەن قاتار الدىڭعى ۇبت-لارعا قاتىسقان تالاپكەرلەر تامىز ۇبت-سىنا ءوتىنىش بەرۋ كەزىندە بەيىندىك پاندەر كومبيناتسياسىن وزگەرتە الادى", دەلىنگەن مينيستر حابارلاماسىندا.
ءوتىنىش بەرۋ بارىسىندا تەستىلەنۋشىلەر ۇبت وتەتىن ورىندى، كۇندى جانە ۋاقىتتى وزدەرى تاڭدايدى.
عىلىم مينيسترلىگىنىڭ مالىمەتىنشە، تامىز ۇبت-سىنا:
- بيىلعى جانە وتكەن جىلدارداعى مەكتەپ پەن كوللەدج تۇلەكتەرى،
- قانداستار (قازاقستان رەسپۋبليكاسىنىڭ ازاماتتارى بولىپ تابىلمايتىن قازاق ۇلتىنىڭ وكىلدەرى),
- شەتەلدە ورتا ءبىلىم العان تۇلەكتەر،
- شىعارماشىلىق ءبىلىم بەرۋ باعدارلامالارىنان باسقا دايارلاۋ باعىتتارىنا اۋىسقىسى كەلەتىن ستۋدەنتتەر،
- باسقا ءبىلىم بەرۋ باعدارلامالارىنان پەداگوگيكالىق باعىتتارعا اۋىسقىسى كەلەتىن ستۋدەنتتەر،
- سونداي-اق الدىڭعى وقۋ جىلىندا شەكتى بالل جيناماعان جانە اقىلى نەگىزدە جوعارى وقۋ ورىندارىنا قابىلدانعان تۇلعالار قاتىسا الادى.
سونىمەن قاتار ءوز ماماندىعى بويىنشا جوعارى وقۋ ورنىندا اقىلى نەگىزدە ءبىلىمىن جالعاستىرۋدى جوسپارلاعان كوللەدج تۇلەكتەرى اڭگىمەلەسۋ ناتيجەلەرى بويىنشا وقۋعا تۇسە الادى. بۇل جاعدايدا قابىلداۋدى جوعارى وقۋ ورىندارىنىڭ قابىلداۋ كوميسسيالارى جۇزەگە اسىرادى.
