فوتو:gov.kz
راديوەلەكترونيكا جانە بايلانىس اسكەري ينجەنەرلىك ينستيتۋتىنىڭ 3-كۋرس كۋرسانتى شىڭعىسحان شىنتەمىروۆ ۇشقىشسىز ۇشۋ اپپاراتتارىنا قارسى قولدانىلاتىن جاڭا راديوەلەكتروندى قۇرىلعىنى ازىرلەدى، دەپ حابارلايدى "ادىرنا".
قورعانىس مينيسترلىگىنىڭ مالىمەتىنشە، ونەرتابىستىڭ باستى ەرەكشەلىگى – ىقشام ءارى جەڭىل بولۋى. بۇل ونى ءتۇرلى جاعدايدا وڭاي الىپ جۇرۋگە جانە جەدەل پايدالانۋعا مۇمكىندىك بەرەدى. قۇرىلعى دروندار مەن Wi-Fi جەلىلەرىنىڭ باسقارۋ جانە بايلانىس ارنالارىن باسىپ، ولاردىڭ جۇمىسىن توقتاتۋعا قاۋقارلى.
شىڭعىسحاننىڭ ايتۋىنشا، اسكەري ماماندىقتى تاڭداۋى بالا كۇنگى ارمانىنىڭ جۇزەگە اسۋى.
«اسكەري ادام بولۋدى بالا كەزدەن ارماندادىم. اكەمە قاراپ بوي تۇزەپ، اسكەري فورمانى كيۋدى ماقسات ەتتىم. بۇگىندە سول ارمانىما جەتىپ، ءوزىم قالاعان ماماندىق بويىنشا ءبىلىم الىپ جاتىرمىن. جاساعان ونەرتابىسىم دا وسى سالامەن تىكەلەي بايلانىستى»، – دەيدى كۋرسانت.
جاس ونەرتاپقىش قۇراستىرعان قۇرىلعى 2,4–2,5 گگتس جيىلىك دياپازونىندا جۇمىس ىستەيدى. مۇنداي راديوەلەكتروندى كۇرەس قۇرالدارى قازىرگى زامانعى اسكەري وپەراتسيالاردا ۇشقىشسىز ۇشۋ اپپاراتتارىنىڭ قىزمەتىن شەكتەۋگە مۇمكىندىك بەرىپ، جەكە قۇرامنىڭ قاۋىپسىزدىگىن كۇشەيتۋگە ىقپال ەتەدى.
