فوتو: gov.kz
استانادا العاش رەت ەلەكتر قۋاتىمەن جۇمىس ىستەيتىن اەروتاكسيدىڭ اشىق كورسەتىلىمى ءوتتى. قالالىق اۋە تاسىمالىن دامىتۋعا باعىتتالعان جوبا «بولاشاق ويىندارى – 2026» حالىقارالىق ويىندارى اياسىندا تانىستىرىلدى، دەپ حابارلايدى "ادىرنا" ۇلتتىق پورتالى Kazinform-عا سىلتەپ.
كورسەتىلىمدى قازاقستاندىق Alatau Advance Air Group Ltd. (AAAG) كومپانياسى قىتايدىڭ AutoFlight كومپانياسىمەن بىرلەسىپ ۇيىمداستىردى. ءىس-شارا بارىسىندا AutoFlight Prosperity دەپ اتالاتىن eVTOL (ەلەكترلى تىك كوتەرىلىپ، تىك قونا الاتىن) اۋە اپپاراتى تانىستىرىلدى.
جاڭا اۋە كولىگى ءبىر ۇشقىش پەن بەس جولاۋشىنى تاسىمالداۋعا ارنالعان. كومپانيا بولاشاقتا اپپاراتتى تولىقتاي ۇشقىشسىز باسقارۋ مۇمكىندىگىن دە قاراستىرىپ وتىر. اەروتاكسيدىڭ ەڭ جوعارى جىلدامدىعى ساعاتىنا 200 شاقىرىمعا دەيىن جەتەدى، ال ءبىر رەت قۋاتتالعان باتارەيامەن شامامەن 200 شاقىرىم ۇشا الادى. ول 13 ەلەكتر قوزعالتقىشىمەن جابدىقتالعاندىقتان، ءداستۇرلى تىكۇشاقتارعا قاراعاندا الدەقايدا تىنىش جۇمىس ىستەيدى جانە اتموسفەراعا كومىرقىشقىل گازىن شىعارمايدى.
العاشقى دەمونستراتسيالىق ۇشۋ حالىقارالىق قاۋىپسىزدىك تالاپتارىنا سايكەس جولاۋشىلارسىز وتكىزىلدى.
Alatau Advance Air Group Ltd. كومپانياسىنىڭ باس ديرەكتورى سەرگەي حەگايدىڭ ايتۋىنشا، بۇل جوبا ءبىر رەتتىك كورسەتىلىممەن شەكتەلمەيدى.
"استاناداعى بۇل ۇشۋ – قازاقستاندا قالالىق اۋە موبيلدىگىن دامىتۋعا باعىتتالعان اۋقىمدى جۇمىستىڭ باستاماسى. ءبىزدىڭ ماقساتىمىز – يننوۆاتسيالىق اۋە كولىگىن ەلدىڭ كولىك ينفراقۇرىلىمىنىڭ اجىراماس بولىگىنە اينالدىرۋ", – دەدى ول.
ايتا كەتەيىك، جوبا بيىل ماۋسىم ايىندا زاڭنامالىق قولداۋعا يە بولدى. پرەزيدەنت قاسىم-جومارت توقاەۆ ەلەكترلى تىك كوتەرىلىپ، تىك قونا الاتىن اۋە اپپاراتتارىن (eVTOL), ۆەرتيپورتتاردى جانە ۇشقىشسىز اۋە قوزعالىسىن باسقارۋ جۇيەسىن قۇقىقتىق تۇرعىدا رەتتەيتىن زاڭعا قول قويعان بولاتىن.
