«ادىرنا» ۇلتتىق پورتالىنىڭ ستۋدياسىندا قىرعىزستاننىڭ مەملەكەت قايراتكەرى سۇيىنبەك قاسمامبەتوۆ قوناق بولىپ، قازاق-قىرعىز قارىم-قاتىناسى، مەملەكەتتىك قىزمەت، قىرعىزستانداعى ساياسي احۋال جانە جەكە ومىرىنە قاتىستى كوپتەگەن ساۋالدارعا جاۋاپ بەردى.
سۇحبات بارىسىندا سۇيىنبەك قاسمامبەتوۆ ەڭ الدىمەن قازاق پەن قىرعىز حالىقتارىنىڭ عاسىرلار بويى قالىپتاسقان باۋىرلاستىق بايلانىسىنا توقتالدى. ول ەكى ەل اراسىنداعى دوستىقتىڭ نىعايۋىنا ءوز ۇلەسىن قالاي قوسقانىن ايتىپ، قازاقستان پرەزيدەنتىن رەسمي ساپار كەزىندە جەكە قارسى العان ساتتەرىن ەسكە الدى.
مەملەكەت قايراتكەرى قازاقتىڭ ۇلى جازۋشىسى مۇحتار اۋەزوۆكە قويىلعان ەرەكشە ەسكەرتكىش تۋرالى ايتىپ، ونىڭ تاريحي ءارى رۋحاني ماڭىزىنا توقتالدى. سونىمەن قاتار قازاق پەن قىرعىز اراسىنداعى قىزىقتى وقيعالارمەن ءبولىسىپ، ەكى حالىقتىڭ ءتىلى تۇبەگەيلى ايىرماشىلىعى جوق ەكەنىن اتاپ ءوتتى.
سۇحباتتا قازاق پەن قىرعىزدىڭ اراسىنا جىك سالۋعا تىرىساتىن كۇشتەر تۋرالى دا ءسوز قوزعالدى. قاسمامبەتوۆ مۇنداي ارەكەتتەردىڭ تاريحي شىندىققا قايشى ەكەنىن ايتىپ، ەكى حالىقتىڭ ىنتىماعى مەن تاتۋلىعى ءاردايىم ماڭىزدى ەكەنىن جەتكىزدى.
سونداي-اق، سۇيىنبەك قاسمامبەتوۆ قازىرگى قىزمەتى تۋرالى ايتىپ، قىرعىزستاننىڭ بىرنەشە پرەزيدەنتىمەن بىرگە جۇمىس ىستەگەن تاجىريبەسىنە توقتالدى. ءاربىر ەل باسشىسىنىڭ ەرەكشەلىگىن سيپاتتاپ، قىرعىزستاندا بيلىك اۋىسقان كەزەڭدەردەگى كوتەرىلىستەردىڭ سەبەپتەرى مەن ساياسي مادەنيەتتىڭ ەرەكشەلىكتەرىنە قاتىستى پىكىرىن ورتاعا سالدى.
