اقش ەكى ءتۇن قاتارىنان يران اۋماعىنا سوققى جاساعان جوق، وسىعان بايلانىستى تەگەران دا جاۋاپ وپەراتسيالارىن ۋاقىتشا توقتاتتى. بۇل تۋرالى يران قارۋلى كۇشتەرىنىڭ رەسمي وكىلى مۇحاممەد ەكرەمينيا مالىمدەدى، دەپ حابارلايدى «ادىرنا» ءتىلشىسى «انادولۋ» اگەنتتىگىنە سىلتەمە جاساپ.
ايتۋىنشا، يراننىڭ ستراتەگياسى جاۋاپ قايتارۋ قاعيداتىنا نەگىزدەلگەن. سوندىقتان يران اسكەرى تاياۋ شىعىستاعى امەريكالىق نىساندارعا جاسالعان سوققىلاردى ۋاقىتشا توقتاتقان.
ەكرەمينيا اقش-تىڭ ستراتەگياسى ۆاشينگتونداعى مەملەكەتتىك قايراتكەرلەردىڭ وزىنە دە تۇسىنىكسىز ەكەنىن جەتكىزدى. ونىڭ سوزىنشە، بۇعان اقش وكىلدەرىنىڭ، سونىڭ ىشىندە پرەزيدەنت دونالد ترامپتىڭ مالىمدەمەلەرى مەن اقش قارۋلى كۇشتەرى قولباسشىلىعىنىڭ ارەكەتتەرى ايقىن دالەل بولادى.
سونداي-اق يران ارمياسىنىڭ وكىلى اقش الداعى ءىس-قيمىلدىڭ ءتۇرلى نۇسقاسىن، ونىڭ ىشىندە اۋقىمدى اۋە شابۋىلدارى مەن قۇرلىقتاعى وپەراتسيانى قاراستىرىپ وتىرعانىن بولجادى.
ودان بولەك ول اقش اسكەري ارەكەتتەردى جالعاستىرۋ تۋرالى شەشىم قابىلداعان جاعدايدا، يران قازىرگى قاقتىعىستىڭ گەوگرافياسىن كەڭەيتەتىنىن ەسكەرتتى.
«ەگەر امەريكالىقتار تاعى دا سيونيستەردىڭ جالعان اقپاراتىنا ەرىپ نەمەسە ولاردىڭ جولىن قۋىپ، سوعىستى، اسىرەسە اۋە شابۋىلدارىن جالعاستىرسا، قاقتىعىس اۋقىمى بۇرىنعىدان دا كەڭەيە تۇسەدى»، – دەپ كەلتىرەدى سپيكەردىڭ ءسوزىن SNN ارناسى.
سونىمەن بىرگە يراننىڭ سىرتقى ىستەر ءمينيسترى ابباس اراكچي تەگەران تاياۋ شىعىس ەلدەرىن ءوز جاۋى دەپ سانامايتىنىن مالىمدەدى. ونىڭ ايتۋىنشا، يراننىڭ بۇل ەلدەردىڭ اۋماعىنا جاساعان سوققىلارى تەك اقش نىساندارىنا قارسى باعىتتالعان.
