سايلاۋ ناۋقانىنىڭ العاشقى كۇندەرى ساياسي پارتيالاردىڭ ءداستۇرلى ۇگىت-ناسيحاتپەن عانا شەكتەلمەي، اشىق ساياسي باسەكەگە دە باسىمدىق بەرگەنىن كورسەتتى. وزدەرىنىڭ سايلاۋالدى باعدارلامالارىن تانىستىرۋمەن قاتار، ولار مەملەكەتتىك كۇن تارتىبىندەگى وزەكتى ماسەلەلەر بويىنشا جاريا پىكىرتالاسقا بەلسەندى تۇردە ارالاستى.
بۇل تۋرالى «سايلاۋ-2026: مەديا جانە تسيفرلىق پلاتفورمالار» ساراپشىلار الاڭىندا «قوعامدىق كەلىسىم» رمم باسقارما باسشىسى ەلدوس جۇماعۇلوۆ مالىمدەدى.
ساراپشىنىڭ ايتۋىنشا، ناۋقاننىڭ العاشقى كەزەڭىنەن-اق قوعام نازارىندا بيزنەس مۇددەلەرىنىڭ وكىلدىگى، سالىق ساياساتى، اۋىلدىق اۋماقتاردى دامىتۋ جانە ەكولوگيالىق كۇن ءتارتىبى ماسەلەلەرى بولدى. بۇل قازىرگى سايلاۋ ناۋقانىنىڭ الدىڭعى سايلاۋلارمەن سالىستىرعاندا مازمۇندى ساياسي باسەكەنىڭ اناعۇرلىم جوعارى دەڭگەيىمەن ەرەكشەلەنەتىنىن كورسەتەدى.
ەلدوس جۇماعۇلوۆتىڭ ايتۋىنشا، ساياسي باسەكە بىردەن بىرنەشە دەڭگەيدە ءوربىپ جاتىر. قاتىسۋشىلار ءبىر-ءبىرىنىڭ كاسىبي قۇزىرەتى مەن ساياسي تاجىريبەسىنە قاتىستى پىكىرتالاس جۇرگىزىپ جاتقان پارتياارالىق پولەميكامەن قاتار، پارتياىشىلىك ۇدەرىستەر دە سايلاۋ ناۋقانىنىڭ بارىسىنا ەلەۋلى ىقپال ەتۋدە.
«مۇنداي جاعدايدا تەلەدەباتتاردىڭ ماڭىزى ەرەكشە ارتادى. ءدال سول جەردە پارتيالاردىڭ ءوزارا سىننان مازمۇندى باعدارلامالىق تالقىلاۋعا كوشە الاتىنى جانە سايلاۋشىلارعا سەنىمدى بالاما ۇسىنا الاتىنى ايقىندالادى. كوپ جاعدايدا بۇكىل سايلاۋ ناۋقانىنىڭ قالاي قابىلداناتىنى وسى پىكىرتالاستاردىڭ ساپاسىنا بايلانىستى بولادى»، – دەپ اتاپ ءوتتى ەلدوس جۇماعۇلوۆ.
ساراپشىنىڭ پىكىرىنشە، اشىق ساياسي باسەكەنىڭ كۇشەيۋى ازاماتتاردىڭ سانالى تاڭداۋ جاساۋىنا ىقپال ەتىپ، ساياسي پارتيالاردىڭ سايلاۋالدى باعدارلامالارىنىڭ ساپاسىنا، دالەلدەرىنىڭ نەگىزدىلىگىنە جانە جاريا كوممۋنيكاتسياسىنىڭ دەڭگەيىنە قويىلاتىن تالاپتاردى ارتتىرادى.
قازاقستان رەسپۋبليكاسىنىڭ پرەزيدەنتى جانىنداعى قازاقستاننىڭ ستراتەگيالىق زەرتتەۋلەر ينستيتۋتى ۇيىمداستىرعان ساراپشىلار الاڭى تسيفرلىق داۋىردەگى ساياسي كوممۋنيكاتسيانىڭ ترانسفورماتسياسى، سايلاۋالدى ۇگىت-ناسيحاتتا جاساندى ينتەللەكتىنى پايدالانۋ، جالعان اقپاراتقا قارسى ءىس-قيمىل، سونداي-اق ەلەكتورالدىق مىنەز-قۇلىقتىڭ زاماناۋي ۇردىستەرى مەن ساياسي پارتيالارعا قاتىستى قوعامدىق كۇتۋلەر ماسەلەلەرىنە ارنالدى.
