پرەزيدەنت قاسىم-جومارت توقاەۆ تۇركى مەملەكەتتەرى ۇيىمىنىڭ 10-شى سامميتىندە ۇيىم قىزمەتىن وڭتايلاندىرۋ شارالارىن جالعاستىرۋ كەرەك ەكەنىن ايتتى، دەپ حابارلايدى «ادىرنا» ءتىلشىسى.
«تۇركى مەملەكەتتەرى ۇيىمى جانىنداعى تۇراقتى وكىلدەرىمىزدى تاعايىنداۋ ماسەلەسىن تەزىرەك شەشۋگە شاقىرامىن. سونداي-اق حاتشىلىق قىزمەتكەرلەرىنىڭ سانىن كوبەيتۋ تۋرالى ۇسىنىستى قولدايمىز. تۇركى مەملەكەتتەرىنىڭ سايلاۋ سالاسىنداعى ىنتىماقتاستىعىن نىعايتۋ قاجەت. ورتالىق سايلاۋ ورگاندارىنىڭ كونسۋلتاتيۆتىك كەڭەسىن قۇرۋعا بولادى. سوڭعى كەزدە ءبىزدىڭ ۇيىمعا حالىقارالىق جانە ايماقتىق قۇرىلىمداردىڭ قىزىعۋشىلىعى ارتا ءتۇستى. ءبىز ەكونوميكالىق ىنتىماقتاستىق ۇيىمىنا بايقاۋشى مارتەبەسىن بەرۋ تۋرالى باستامانى قولدايمىز. سونىمەن قاتار ازىق-تۇلىك قاۋىپسىزدىگى جونىندەگى يسلام ۇيىمىمەن ىنتىماقتاستىق ورناتۋدى ۇسىنامىز»،—دەدى پرەزيدەنت.
