استانا قالاسى پوليتسيا دەپارتامەنتى كوشى-قون قىزمەتى باسقارماسى باستىعىنىڭ ورىنباسارى ءاليا ماقاەۆاعا قاتىستى سوتقا دەيىنگى تەرگەۋ جۇرگىزىلىپ جاتىر. بۇل اقپاراتتى ۇلتتىق قاۋىپسىزدىك كوميتەتى راستادى، دەپ حابارلايدى «ادىرنا» ءتىلشىسى.
ءىستىڭ ناقتى قاي باپ بويىنشا تەرگەلىپ جاتقانى ازىرگە بەلگىسىز.
«قازىرگى ۋاقىتتا سوتقا دەيىنگى تەرگەۋ جۇرگىزىلۋدە. قىلمىستىق-پروتسەستىك كودەكستىڭ 201-بابىنا سايكەس وزگە اقپارات جاريا ەتىلمەيدى»، – دەلىنگەن حابارلامادا.
ءاليا ماقاەۆا رەسەيدىڭ نوۆگورود وبلىسىندا دۇنيەگە كەلگەن. 2001 جىلى ورال مەملەكەتتىك زاڭ اكادەمياسىنىڭ زاڭ فاكۋلتەتىن تامامداعان. ىشكى ىستەر ورگاندارىنداعى ەڭبەك جولىن استانا قالاسىنداعى الماتى اۋدانى ىشكى ىستەر باسقارماسىنىڭ تاربيە جانە كادر جۇمىسى جونىندەگى ينسپەكتورى رەتىندە باستاعان. 2004–2018 جىلدارى ەسىل اۋدانى كوشى-قون پوليتسياسىنىڭ اعا ينسپەكتورى قىزمەتىن اتقارعان. كەيىن ايەلدەردى زورلىق-زومبىلىقتان قورعاۋ ماسەلەلەرىمەن اينالىسىپ، ازاماتتىق جانە يمميگراتسيا بولىمىندە ەرەكشە تاپسىرمالار بويىنشا جۇمىس ىستەگەن.
2022 جىلدىڭ ناۋرىزىندا ەلوردالىق پوليتسيانىڭ كوشى-قون قىزمەتى باسقارماسىنداعى ازاماتتىق جانە يمميگراتسيا ءبولىمىنىڭ باسشىسى بولىپ تاعايىندالسا، كەيىن باسقارما باستىعىنىڭ ورىنباسارى قىزمەتىنە كوتەرىلگەن.
