وزبەكستان بيلىگى الەۋمەتتىك قولداۋعا مۇقتاج ازاماتتارعا قوسىمشا كومەك كورسەتۋ شارالارىن ازىرلەدى. اتاپ ايتقاندا، باسپاناسىز ادامدارعا كاسىپتىك وقىتۋ كۋرستارى ۇيىمداستىرىلىپ، ادام ساۋداسىنان زارداپ شەككەن ايەلدەر مەن بالالاردى قورعاۋ كۇشەيتىلەدى. بۇل باستامالار ەل پرەزيدەنتى شاۆكات ميرزيوەۆتىڭ توراعالىعىمەن وتكەن كەڭەستە تالقىلاندى، دەپ حابارلايدى «ادىرنا» ءتىلشىسى مەملەكەت باسشىسىنىڭ ءباسپاسوز قىزمەتىنە سىلتەمە جاساپ.
شەنەۋنىكتەردىڭ ايتۋىنشا، تۇراقتى تۇرعىلىقتى جەرى جوق ادامدارعا الەۋمەتتىك قىزمەت كورسەتۋ جۇيەسىن جەتىلدىرۋ ءۇشىن جاڭا تاسىلدەر ازىرلەنگەن. قازىرگى ۋاقىتتا رەسپۋبليكادا جالپى 726 ورىنعا ارنالعان 11 وڭالتۋ ورتالىعى جۇمىس ىستەيدى. بيىلعى جىلدىڭ العاشقى جارتىسىندا بۇل مەكەمەلەرگە 1,1 مىڭ ادام ورنالاستىرىلعان.
جۇيەنىڭ تيىمدىلىگىن ارتتىرۋ ماقساتىندا اتالعان مەكەمەلەر ۋاقىتشا ورنالاستىرۋ جانە الەۋمەتتىك قايتا بەيىمدەۋ ورتالىقتارىنا اينالدىرىلادى. باسپاناسىز ازاماتتار بۇل ورتالىقتارعا ءوز ءوتىنىشى بويىنشا، «ماحاللا جەتىلىگىنىڭ» زەرتتەۋ قورىتىندىسى نەگىزىندە نەمەسە الەۋمەتتىك قىزمەتكەر مەن پروفيلاكتيكا ينسپەكتورىنىڭ كومەگى ارقىلى قابىلدانا الادى. ءاربىر مۇقتاج ادام ءۇشىن جەكە جوسپار ازىرلەنىپ، وعان قۇجاتتارىن قالپىنا كەلتىرۋ، مەديتسينالىق كومەك كورسەتۋ، كاسىپتىك ءبىلىم بەرۋ جانە جۇمىسقا ورنالاستىرۋ شارالارى ەنگىزىلەدى.
ورتالىقتاردا جۇمىسپەن قامتۋعا جاردەمدەسەتىن بولىمشەلەر اشىلىپ، بوس تۇرعان عيماراتتار جەڭىلدەتىلگەن شارتتارمەن جەكە كاسىپكەرلەرگە جالعا بەرىلەدى. سونداي-اق باسپاناسىز ادامدار ءۇشىن ۆاۋچەرلىك جۇيە ەنگىزۋ جوسپارلانىپ وتىر. مۇنداي قۇجاتتار ولاردىڭ كاسىپ مەڭگەرۋىنە مۇمكىندىك بەرەدى. سونىمەن قاتار ولار الەۋمەتتىك وسال توپتار قاتارىنا ەنگىزىلىپ، ارنايى جۇمىس ورىندارى رەزەرۆكە قويىلادى.
كەڭەستە ادام ساۋداسىنان زارداپ شەككەندەرگە كومەك كورسەتۋ تەتىكتەرىن كۇشەيتۋ ماسەلەسىنە ەرەكشە نازار اۋدارىلدى. 2026 جىلعى 1 قىركۇيەكتەن باستاپ ماحاللا جانە اۋدان دەڭگەيىندەگى «ينسون» ورتالىقتارى ارقىلى قيىن جاعدايعا تاپ بولعان ازاماتتاردىڭ احۋالىن باعالاۋ جۇيەسى ەنگىزىلىپ، كەيىن ولار ءتيىستى قىزمەتتەرگە باعىتتالاتىن بولادى.
بۇدان بولەك، ايەلدەردى وڭالتۋ جانە بەيىمدەۋ رەسپۋبليكالىق ورتالىعى ايەلدەر مەن بالالاردى وڭالتۋ رەسپۋبليكالىق ورتالىعى بولىپ قايتا اتالادى. قاراقالپاقستاندا، قاشقاداريا، سامارقاند جانە فەرعانا وبلىستارىندا ورنالاسقان بۇل مەكەمەلەردە ادام ساۋداسىنان زارداپ شەككەن ايەلدەر مەن ولاردىڭ كامەلەتكە تولماعان بالالارى قابىلدانادى. ولار ءۇشىن قوسىمشا ورىندار اشىلادى.
سالالىق ۆەدومستۆولاردىڭ وكىلدەرى بالالار ساۋداسى ءۇشىن جەكە قىلمىستىق جاۋاپكەرشىلىك ەنگىزۋدى، سونداي-اق مۇنداي قىلمىس جاساعان ادامداردىڭ ەڭبەك جانە سىرتقى كوشى-قون سالاسىندا قىزمەت ەتۋ قۇقىعىن شەكتەۋدى ۇسىندى.
پرەزيدەنتكە مۇمكىندىگى شەكتەۋلى جاندارعا، ەكىنشى دۇنيەجۇزىلىك سوعىس ارداگەرلەرى مەن ولارعا تەڭەستىرىلگەن ازاماتتارعا، سونداي-اق چەرنوبىل اەس اپاتىنىڭ سالدارىن جويۋعا قاتىسۋشىلارعا ارنالعان كولىك جەڭىلدىكتەرىن پايدالانۋ ءتارتىبىن جەڭىلدەتۋ جونىندەگى باستامالار دا تانىستىرىلدى. قازىرگى تاڭدا مۇنداي جەڭىلدىكتەردى 48,4 مىڭ ازامات پايدالانا الادى. وتكەن جىلى ولار كولىك قىزمەتتەرىن 1,7 ميلليون رەت قولدانعان.
جاڭا تارتىپكە سايكەس، ازاماتتاردىڭ 11 ساناتىنا تەگىن جول ءجۇرۋ نەمەسە بيلەت قۇنىنىڭ 50 پايىزى كولەمىندە جەڭىلدىك بەرىلەدى. بۇل ەرەجە قالاارالىق تاسىمالدارعا، سونىڭ ىشىندە اۋە جانە تەمىرجول قاتىناستارىنا دا قولدانىلادى.
جەڭىلدىكپەن بيلەت ساتىپ الۋ ءۇشىن ID-كارتا نەمەسە بيومەتريالىق پاسپورت كورسەتۋ جەتكىلىكتى بولادى. ازاماتتىڭ جەڭىلدىك الۋ قۇقىعى بىرىڭعاي اقپاراتتىق جۇيە ارقىلى تەكسەرىلەدى.
2027 جىلعى 1 قاڭتاردان باستاپ جەڭىلدىك بيلەتتەرىن پايدالانۋشىنىڭ الەۋمەتتىك كارتاسىمەن بايلانىستىرىلعان Baraka ءموبيلدى قوسىمشاسى ارقىلى ونلاين ساتىپ الۋ مۇمكىندىگى ەنگىزىلەدى.
