Özbekstan bilıgı äleumettık qoldauǧa mūqtaj azamattarǧa qosymşa kömek körsetu şaralaryn äzırledı. Atap aitqanda, baspanasyz adamdarǧa käsıptık oqytu kurstary ūiymdastyrylyp, adam saudasynan zardap şekken äielder men balalardy qorǧau küşeitıledı. Būl bastamalar el prezidentı Şavkat Mirziioevtıŋ töraǧalyǧymen ötken keŋeste talqylandy, dep habarlaidy «Adyrna» tılşısı memleket basşysynyŋ baspasöz qyzmetıne sılteme jasap.
Şeneunıkterdıŋ aituynşa, tūraqty tūrǧylyqty jerı joq adamdarǧa äleumettık qyzmet körsetu jüiesın jetıldıru üşın jaŋa täsılder äzırlengen. Qazırgı uaqytta respublikada jalpy 726 orynǧa arnalǧan 11 oŋaltu ortalyǧy jūmys ısteidı. Biylǧy jyldyŋ alǧaşqy jartysynda būl mekemelerge 1,1 myŋ adam ornalastyrylǧan.
Jüienıŋ tiımdılıgın arttyru maqsatynda atalǧan mekemeler uaqytşa ornalastyru jäne äleumettık qaita beiımdeu ortalyqtaryna ainaldyrylady. Baspanasyz azamattar būl ortalyqtarǧa öz ötınışı boiynşa, «mahalla jetılıgınıŋ» zertteu qorytyndysy negızınde nemese äleumettık qyzmetker men profilaktika inspektorynyŋ kömegı arqyly qabyldana alady. Ärbır mūqtaj adam üşın jeke jospar äzırlenıp, oǧan qūjattaryn qalpyna keltıru, medisinalyq kömek körsetu, käsıptık bılım beru jäne jūmysqa ornalastyru şaralary engızıledı.
Ortalyqtarda jūmyspen qamtuǧa järdemdesetın bölımşeler aşylyp, bos tūrǧan ǧimarattar jeŋıldetılgen şarttarmen jeke käsıpkerlerge jalǧa berıledı. Sondai-aq baspanasyz adamdar üşın vaucherlık jüie engızu josparlanyp otyr. Mūndai qūjattar olardyŋ käsıp meŋgeruıne mümkındık beredı. Sonymen qatar olar äleumettık osal toptar qataryna engızılıp, arnaiy jūmys oryndary rezervke qoiylady.
Keŋeste adam saudasynan zardap şekkenderge kömek körsetu tetıkterın küşeitu mäselesıne erekşe nazar audaryldy. 2026 jylǧy 1 qyrküiekten bastap mahalla jäne audan deŋgeiındegı «İnson» ortalyqtary arqyly qiyn jaǧdaiǧa tap bolǧan azamattardyŋ ahualyn baǧalau jüiesı engızılıp, keiın olar tiıstı qyzmetterge baǧyttalatyn bolady.
Būdan bölek, Äielderdı oŋaltu jäne beiımdeu respublikalyq ortalyǧy Äielder men balalardy oŋaltu respublikalyq ortalyǧy bolyp qaita atalady. Qaraqalpaqstanda, Qaşqadariia, Samarqand jäne Ferǧana oblystarynda ornalasqan būl mekemelerde adam saudasynan zardap şekken äielder men olardyŋ kämeletke tolmaǧan balalary qabyldanady. Olar üşın qosymşa oryndar aşylady.
Salalyq vedomstvolardyŋ ökılderı balalar saudasy üşın jeke qylmystyq jauapkerşılık engızudı, sondai-aq mūndai qylmys jasaǧan adamdardyŋ eŋbek jäne syrtqy köşı-qon salasynda qyzmet etu qūqyǧyn şekteudı ūsyndy.
Prezidentke mümkındıgı şekteulı jandarǧa, Ekınşı düniejüzılık soǧys ardagerlerı men olarǧa teŋestırılgen azamattarǧa, sondai-aq Chernobyl AES apatynyŋ saldaryn joiuǧa qatysuşylarǧa arnalǧan kölık jeŋıldıkterın paidalanu tärtıbın jeŋıldetu jönındegı bastamalar da tanystyryldy. Qazırgı taŋda mūndai jeŋıldıkterdı 48,4 myŋ azamat paidalana alady. Ötken jyly olar kölık qyzmetterın 1,7 million ret qoldanǧan.
Jaŋa tärtıpke säikes, azamattardyŋ 11 sanatyna tegın jol jüru nemese bilet qūnynyŋ 50 paiyzy kölemınde jeŋıldık berıledı. Būl ereje qalaaralyq tasymaldarǧa, sonyŋ ışınde äue jäne temırjol qatynastaryna da qoldanylady.
Jeŋıldıkpen bilet satyp alu üşın ID-karta nemese biometriialyq pasport körsetu jetkılıktı bolady. Azamattyŋ jeŋıldık alu qūqyǧy bıryŋǧai aqparattyq jüie arqyly tekserıledı.
2027 jylǧy 1 qaŋtardan bastap jeŋıldık biletterın paidalanuşynyŋ äleumettık kartasymen bailanystyrylǧan Baraka mobildı qosymşasy arqyly onlain satyp alu mümkındıgı engızıledı.
