جەتىسۋ وبلىسى قۇرىلعاننان بەرى تالدىقورعان قالاسىندا 187 كوپ قاباتتى تۇرعىن ءۇيدىڭ اۋلاسىنا جوندەۋ جانە اباتتاندىرۋ جۇمىستارى جۇرگىزىلدى. بيىل تاعى 19 اۋلانى قايتا جاڭعىرتۋ قولعا الىنعان. جۇمىس ساپارى بارىسىندا وبلىس اكىمى بەيبىت يساباەۆ جاڭارتىلىپ جاتقان اۋلالاردىڭ بىرىنە بارىپ، مەردىگەر ۇيىمعا بىرقاتار ناقتى تاپسىرما بەردى، تۇرعىندارمەن پىكىر الماستى. ءوڭىر باسشىسى قالانى اباتتاندىرۋ جۇمىستارى كەشەندى تاسىلمەن جۇزەگە اسىرىلىپ جاتقانىن اتاپ ءوتىپ، باستى ماقسات جاڭارتىلعان اۋلالاردىڭ تۇرعىندارعا ۇزاق جىلدار بويى ساپالى قىزمەت ەتۋىن قامتاماسىز ەتۋ ەكەنىن ايتتى، - دەپ حابارلايدى جەتىسۋ وبلىسى اكىمىنىڭ ءباسپاسوز قىزمەتى.
«بولاشاق» شاعىن اۋدانىنىڭ №43 كوپ قاباتتى تۇرعىن ءۇيىنىڭ اۋلاسىن اباتتاندىرۋ جوباسى اياقتالۋعا جاقىن. قازىرگى تاڭدا نەگىزگى جۇمىستار تولىقتاي ورىندالدى. جوبا اياسىندا قاۋىپسىزدىك، جايلىلىق، قولايلىلىق ماسەلەلەرىنە ەرەكشە ءمان بەرىلدى. اسفالت پەن تروتۋار پليتكاسى توسەلدى. اۋلا قورشالىپ، ەكى بالالار ويىن الاڭى سالىندى. سونىمەن قاتار اۆتوكولىكتەرگە ارنالعان تۇراق قاراستىرىلىپ، قوقىس كونتەينەرلەرىن ورنالاستىرۋ الاڭى تالاپقا ساي ايماقتارعا ءبولىندى. الداعى ۋاقىتتا جارىق شامدارى، ورىندىقتار، قوقىس جاشىكتەرى، وزگە دە قاجەتتى اباتتاندىرۋ ەلەمەنتتەرى ورناتىلادى. وبلىس اكىمى بارلىق جۇمىستىڭ ساپالى ءارى بەلگىلەنگەن مەرزىمدە اياقتالۋى كەرەكتىگىن ايتتى. سونىمەن قاتار تۇرعىنداردىڭ ءوز اۋلالارىنا ۇقىپتىلىقپەن قاراپ، كوگالداندىرۋ جۇمىستارىنا بەلسەندى اتسالىسۋىنىڭ ماڭىزدىلىعىن اتاپ ءوتتى.
- وتكەن جىلدان باستاپ تالدىقورعان قالاسىنىڭ بيۋدجەتى 30 پايىزعا ۇلعايتىلدى. سونىڭ ناتيجەسىندە وبلىس ورتالىعىن اباتتاندىرۋدا اۋقىمدى جۇمىستار باستالدى. جولداردى جاڭارتىپ، كوپقاباتتى تۇرعىن ۇيلەردىڭ اۋلالارىن، قاسبەتتەرى مەن شاتىرلارىن جوندەپ جاتىرمىز. جاسىل ايماقتاردا اۆتوماتتى سۋارۋ جۇيەلەرى ورناتىلىپ، جاڭا ساياباقتار مەن گۇلزارلار سالىنۋدا. ەڭ باستىسى – جايلى قالالىق ورتانى قالىپتاستىرۋدا كەشەندى ءتاسىلدى قاتاڭ ۇستانىپ كەلەمىز. بۇل جۇمىستا قالا تۇرعىندارىنىڭ قولداۋى مەن بەلسەندىلىگى دە ايرىقشا ماڭىزدى. مەملەكەت باسشىسى اتاپ وتكەندەي، ءبارى تازالىقتان باستالادى. بۇل – تەك قورشاعان ورتانىڭ تازالىعى عانا ەمەس، ادامنىڭ جان تازالىعى. ءار ازاماتتىڭ بويىندا «مەنىڭ ءۇيىم – مەنىڭ اۋلام – مەنىڭ قالام – مەنىڭ ەلىم» دەگەن پاتريوتتىق ۇستانىم بەرىك ورنىعۋى قاجەت، – دەدى ب. يساباەۆ.
تۇرعىنداردىڭ ايتۋىنشا، بۇگىندە ولاردىڭ اۋلاسى ايتارلىقتاي وزگەرىپ، كوركەيە تۇسكەن.
– جەتى جىلدىڭ ىشىندە العاش رەت جاڭا بالالار ويىن الاڭى سالىندى. مەن زەينەتكەرمىن، ءۇش نەمەرەم بار. وسىنداي قامقورلىق كورسەتكەن مەملەكەتكە العىسىمدى بىلدىرەمىن. ەندىگى مىندەت – بالالارعا وسى يگىلىكتى كوزدىڭ قاراشىعىنداي ساقتاۋدى ۇيرەتۋىمىز كەرەك. ولاردى كىشكەنتايىنان اينالاسىنا قۇرمەتپەن قاراۋعا، وزگەنىڭ ەڭبەگىن باعالاۋعا، ءوزى تۇراتىن، ءوسىپ-ونگەن ورتانى ايالاپ، كۇتىپ ۇستاۋعا تاربيەلەۋ ماڭىزدى، – دەدى وسى شاعىن اۋداننىڭ تۇرعىنى نايمان ابدىراشەۆا.
اتاپ وتسەك، وبلىس قۇرىلعاننان بەرى «حالىق قاتىساتىن بيۋدجەت» باعدارلاماسى اياسىندا وڭىردە 25 بالالار ويىن جانە سپورت الاڭى ورناتىلدى. ال بيىل تاعى 21 وسىنداي الاڭدى پايدالانۋعا بەرۋ جوسپارلانىپ وتىر.
