Jetısu oblysy qūrylǧannan berı Taldyqorǧan qalasynda 187 köp qabatty tūrǧyn üidıŋ aulasyna jöndeu jäne abattandyru jūmystary jürgızıldı. Biyl taǧy 19 aulany qaita jaŋǧyrtu qolǧa alynǧan. Jūmys sapary barysynda oblys äkımı Beibıt İsabaev jaŋartylyp jatqan aulalardyŋ bırıne baryp, merdıger ūiymǧa bırqatar naqty tapsyrma berdı, tūrǧyndarmen pıkır almasty. Öŋır basşysy qalany abattandyru jūmystary keşendı täsılmen jüzege asyrylyp jatqanyn atap ötıp, basty maqsat jaŋartylǧan aulalardyŋ tūrǧyndarǧa ūzaq jyldar boiy sapaly qyzmet etuın qamtamasyz etu ekenın aitty, - dep habarlaidy Jetısu oblysy äkımınıŋ baspasöz qyzmetı.
«Bolaşaq» şaǧyn audanynyŋ №43 köp qabatty tūrǧyn üiınıŋ aulasyn abattandyru jobasy aiaqtaluǧa jaqyn. Qazırgı taŋda negızgı jūmystar tolyqtai oryndaldy. Joba aiasynda qauıpsızdık, jailylyq, qolailylyq mäselelerıne erekşe män berıldı. Asfalt pen trotuar plitkasy töseldı. Aula qorşalyp, ekı balalar oiyn alaŋy salyndy. Sonymen qatar avtokölıkterge arnalǧan tūraq qarastyrylyp, qoqys konteinerlerın ornalastyru alaŋy talapqa sai aimaqtarǧa bölındı. Aldaǧy uaqytta jaryq şamdary, oryndyqtar, qoqys jäşıkterı, özge de qajettı abattandyru elementterı ornatylady. Oblys äkımı barlyq jūmystyŋ sapaly ärı belgılengen merzımde aiaqtaluy kerektıgın aitty. Sonymen qatar tūrǧyndardyŋ öz aulalaryna ūqyptylyqpen qarap, kögaldandyru jūmystaryna belsendı atsalysuynyŋ maŋyzdylyǧyn atap öttı.
- Ötken jyldan bastap Taldyqorǧan qalasynyŋ biudjetı 30 paiyzǧa ūlǧaityldy. Sonyŋ nätijesınde oblys ortalyǧyn abattandyruda auqymdy jūmystar bastaldy. Joldardy jaŋartyp, köpqabatty tūrǧyn üilerdıŋ aulalaryn, qasbetterı men şatyrlaryn jöndep jatyrmyz. Jasyl aimaqtarda avtomatty suaru jüielerı ornatylyp, jaŋa saiabaqtar men gülzarlar salynuda. Eŋ bastysy – jaily qalalyq ortany qalyptastyruda keşendı täsıldı qataŋ ūstanyp kelemız. Būl jūmysta qala tūrǧyndarynyŋ qoldauy men belsendılıgı de airyqşa maŋyzdy. Memleket basşysy atap ötkendei, bärı tazalyqtan bastalady. Būl – tek qorşaǧan ortanyŋ tazalyǧy ǧana emes, adamnyŋ jan tazalyǧy. Är azamattyŋ boiynda «Menıŋ üiım – menıŋ aulam – menıŋ qalam – menıŋ elım» degen patriottyq ūstanym berık ornyǧuy qajet, – dedı B. İsabaev.
Tūrǧyndardyŋ aituynşa, bügınde olardyŋ aulasy aitarlyqtai özgerıp, körkeie tüsken.
– Jetı jyldyŋ ışınde alǧaş ret jaŋa balalar oiyn alaŋy salyndy. Men zeinetkermın, üş nemerem bar. Osyndai qamqorlyq körsetken memleketke alǧysymdy bıldıremın. Endıgı mındet – balalarǧa osy igılıktı közdıŋ qaraşyǧyndai saqtaudy üiretuımız kerek. Olardy kışkentaiynan ainalasyna qūrmetpen qarauǧa, özgenıŋ eŋbegın baǧalauǧa, özı tūratyn, ösıp-öngen ortany aialap, kütıp ūstauǧa tärbieleu maŋyzdy, – dedı osy şaǧyn audannyŋ tūrǧyny Naiman Äbdıraşeva.
Atap ötsek, oblys qūrylǧannan berı «Halyq qatysatyn biudjet» baǧdarlamasy aiasynda öŋırde 25 balalar oiyn jäne sport alaŋy ornatyldy. Al biyl taǧy 21 osyndai alaŋdy paidalanuǧa beru josparlanyp otyr.
