16 تامىزدان باستاپ ۇلكەن الماتى اينالما اۆتوكولىك جولىمەن ء(ۇاااج) ءجۇرۋ قۇنى ارتادى، دەپ حابارلايدى "ادىرنا" ۇلتتىق پورتالى.
بۇل كولىك ءمينيسترى مىندەتىن اتقارۋشى ماقسات قالياقپاروۆ قول قويعان بۇيرىققا سايكەس جۇزەگە اسادى. قۇجات العاشقى رەسمي جاريالانعان كۇننەن كەيىن كۇنتىزبەلىك 10 كۇن وتكەن سوڭ كۇشىنە ەنەدى.
جاڭا تاريف بويىنشا جەڭىل اۆتوكولىكتەر ءۇشىن ءبىر رەتتىك جول ءجۇرۋ قۇنى 0,14 ايلىق ەسەپتىك كورسەتكىشتى (605,5 تەڭگە) قۇرايدى. بۇعان دەيىن بۇل ساناتتاعى كولىكتەر ءۇشىن تاريف 0,07 اەك بولعان.
سونداي-اق 16 ورىنعا دەيىنگى اۆتوبۋستار مەن جۇك كوتەرگىشتىگى 2,5 تونناعا دەيىنگى جۇك كولىكتەرى ءۇشىن جول اقىسى – 692 تەڭگە، 32 ورىنعا دەيىنگى اۆتوبۋستار مەن 5,5 تونناعا دەيىنگى جۇك كولىكتەرى ءۇشىن – 1 211 تەڭگە، 32 ورىننان اساتىن اۆتوبۋستار مەن 10 تونناعا دەيىنگى جۇك كولىكتەرى ءۇشىن – 1 384 تەڭگە بولادى. ال جۇك كوتەرگىشتىگى 10-15 توننا ارالىعىنداعى جۇك كولىكتەرى 1 730 تەڭگە، 15 توننادان اساتىن جۇك كولىكتەرى، ونىڭ ىشىندە تىركەمەسى مەن جارتىلاي تىركەمەسى بار كولىكتەر 1 903 تەڭگە تولەيدى.
مينيسترلىك مالىمەتىنشە، ايلىق جانە جىلدىق ابونەمەنتتەردىڭ قۇنى وزگەرىسسىز ساقتالادى.
سونىمەن قاتار جۇرگىزۋشىلەرگە ەكى جاعدايدا جول ءجۇرۋ اقىسىنا 50 پايىزدىق جەڭىلدىك قاراستىرىلعان. جەڭىلدىك اقىلى جولعا كىرگەنگە دەيىن الدىن الا تولەم جاسالعاندا نەمەسە جول اقىسى جۇيەدە تىركەلگەننەن كەيىن جەتى جۇمىس كۇنى ىشىندە تولەنگەن جاعدايدا قولدانىلادى. بەلگىلەنگەن مەرزىم وتكەننەن كەيىن جەڭىلدىك بەرىلمەيدى.
