قازاقستان ۇلتتىق پاراليمپيادا كوميتەتىنىڭ پرەزيدەنتى قايرات بورانباەۆ حالىقارالىق زاعيپتار سپورت فەدەراتسياسىنىڭ (IBSA) اتقارۋشى كەڭەسىنىڭ مۇشەسى بولىپ تاعايىندالدى، دەپ حابارلايدى "ادىرنا" ۇلتتىق پورتالى.
ءتيىستى شەشىم 2026 جىلعى 3 تامىزدا وتكەن IBSA اتقارۋشى كەڭەسىنىڭ وتىرىسىندا قابىلدانعان. IBSA – كورۋ قابىلەتى بۇزىلعان سپورتشىلار اراسىندا سپورتتى دامىتۋعا جانە ولاردىڭ حالىقارالىق جارىستارعا قاتىسۋىنا جاعداي جاساۋعا باعىتتالعان حالىقارالىق ۇيىم. فەدەراتسيا قۇرامىنا الەمنىڭ 100-دەن استام ەلىندەگى ۇلتتىق سپورت ۇيىمدارى كىرەدى.
قازاقستان ۇلتتىق پاراليمپيادا كوميتەتىنىڭ مالىمەتىنشە، قايرات بورانباەۆتىڭ IBSA-نىڭ باسقارۋشى ورگانىنا مۇشە بولۋى قازاقستاننىڭ حالىقارالىق پاراليمپيادالىق قوزعالىستاعى ءرولىن كۇشەيتۋگە مۇمكىندىك بەرەدى.
سونداي-اق بۇل تاعايىنداۋ حالىقارالىق ىنتىماقتاستىقتى كەڭەيتۋگە، كورۋ قابىلەتى بۇزىلعان سپورتشىلاردى قولداۋعا باعىتتالعان جوبالاردى دامىتۋعا جانە قازاقستاننىڭ الەمدىك پاراسپورت سالاسىنداعى باستامالارعا بەلسەندى قاتىسۋىنا جول اشادى.
