قارجى مونيتورينگى اگەنتتىگى قايرات بورانباەۆتىڭ مۇلكىن مەملەكەت مەنشىگىنە قايتارۋ شارالارىن قابىلداۋدا، دەپ حابارلايدى «ادىرنا» ۇلتتىق پورتالى.
«قاراجانباس سەۆەرنىي» كەن ورنى مەملەكەت مەنشىگىنە ءوتتى. ونىڭ وندىرىستىك پارامەترلەرى – قۇنى 35,4 ميلليارد تەڭگە بولاتىن 2,6 ملن توننا مۇناي جانە 13,2 ملن تەكشە مەتر گاز بار 143 ۇڭعىما.
بورانباەۆ تاۋارلىق گازدى تاسىمالداۋمەن جانە ساتۋمەن اينالىساتىن نارىقتىق قۇنى 14 ميلليارد تەڭگەگە جۋىق «ازيا گاز چۋندجا» گاز تاراتۋشى كومپانياسىن مەملەكەت مەنشىگىنە بەردى.
سونىمەن قاتار قۇنى 9 ميلليارد تەڭگە بولاتىن «سەرۆيسنىي تسەنتر كازتۋربورەمونت» جشس مۇناي-گاز جابدىقتارىن ءوندىرۋ جانە جوندەۋ زاۋىتى مەملەكەت مەنشىگىنە وتەدى. كاسىپورىن جۇمىسشىلارىنىڭ سانى 740 ادامدى قۇرايدى»، - دەلىنگەن حابارلامادا.
بۇل نىسانداردىڭ بارلىعى مەملەكەتتىك پايداسىنا وتەدى.
ەستەرىڭىزگە سالا كەتەيىك، بورانباەۆ 31 ناۋرىزدا سەگىز جىلعا باس بوستاندىعىنان ايىرىلعان بولاتىن. 14 قىركۇيەكتە قارجى مونيتورينگى اگەنتتىگى بورانباەۆتىڭ مەملەكەتكە 120 ميلليارد تەڭگەنىڭ مۇلكىن قايتارعانىن، ال 15 قىركۇيەكتە كاسىپكەردىڭ باس بوستاندىعىنان ايىرۋ مەرزىمى التى جىلعا دەيىن قىسقارتىلعانىن حابارلادى. 14 قازاندا بورانباەۆقا قاتىسى بار ماڭعىستاۋ وبلىسىنداعى Phystech II اق مۇناي كومپانياسىنىڭ 100% اكتسياسى مەملەكەتكە بەرىلگەنىن حابارلادى. 16 قازاندا بورانباەۆتىڭ قۇنى 1,4 ملرد تەڭگە بولاتىن «Comfort Hotel Astana» قوناقۇيىن مەملەكەت مەنشىگىنە وتكىزگەنى حابارلانسا، 17 قازاندا كاسىپكەردىڭ شەتەلگە اۋدارىلعان 30 ملرد تەڭگەنى ءبىلىم بەرۋ ينفراقۇرىلىمىن قولداۋ قورىنا اۋدارعانى بەلگىلى بولدى. سونداي-اق استانا، الماتى جانە قوستانايدا 34 ميلليارد تەڭگەگە تاعى بىرقاتار اكتيۆتەردى مەملەكەت مەنشىگىنە وتكىزگەن بولاتىن.
