قازاقستان ۋكرايناداعى جاعدايدى رەتتەۋ جونىندەگى كەلىسسوزدەر ءۇشىن ءوز الاڭىن بىرنەشە رەت ۇسىنعانى تۋرالى اقپارات تارادى، دەپ حابارلايدى "ادىرنا" ۇلتتىق پورتالى.
بۇل تۋرالى رەسەي سىرتقى ىستەر ءمينيسترىنىڭ ورىنباسارى ميحايل گالۋزين تاسس-قا بەرگەن سۇحباتىندا ايتقان.
ميحايل گالۋزين قازاقستان باسشىلىعىنىڭ ۋكرايناداعى جاعدايعا نازار اۋدارىپ، قاقتىعىستى بەيبىت جولمەن رەتتەۋگە باعىتتالعان باستامالارىن رەسەي تاراپى جوعارى باعالايتىنىن اتاپ ءوتتى.
«استانا كەلىسسوزدەر وتكىزۋ ءۇشىن ءوز الاڭىن بىرنەشە رەت ۇسىندى»، – دەدى رەسەي ءسىم باسشىسىنىڭ ورىنباسارى.
ونىڭ ايتۋىنشا، رەسەي مەن قازاقستان اراسىندا ءوزارا سەنىمگە نەگىزدەلگەن قارىم-قاتىناس قالىپتاسقان. بۇل تاراپتارعا ستراتەگيالىق ماڭىزى بار بىرقاتار ماسەلە بويىنشا اشىق ديالوگ جۇرگىزۋگە مۇمكىندىك بەرەدى.
گالۋزين قازاقستاندى رەسەيدىڭ تاۋەلسىز مەملەكەتتەر دوستاستىعىنداعى جاقىن سەرىكتەستەرىنىڭ ءبىرى ءارى وداقتاسى دەپ اتادى.
رەسەي ءسىم وكىلى ماسكەۋ ۋكرايناداعى جاعدايدى رەتتەۋگە قاتىستى انكوريدجدەگى كەلىسىمدەرگە ادالدىعىن ساقتاپ وتىرعانىن دا ايتتى.
«ۋكراينا توڭىرەگىندەگى جاعدايدى ديپلوماتيالىق جولمەن رەتتەۋگە بولادى دەپ سانايمىز. ول ءۇشىن ءتيىستى ساياسي ەرىك قاجەت»، – دەدى ميحايل گالۋزين.
بۇعان دەيىن قازاقستان تاراپى حالىقارالىق جانە وڭىرلىك ماسەلەلەر بويىنشا كەلىسسوزدەر جۇرگىزۋگە الاڭ ۇسىنۋعا دايىن ەكەنىن بىرنەشە رەت حابارلاعان.
