شىمكەنتتە 21 جاستاعى نۇرايدىڭ ولىمىنە قاتىستى 11 تامىزدا وتكەن سوت وتىرىسىندا مەملەكەتتىك ايىپتاۋشى سوتتالۋشى شەرحان ايماحاندى ءومىر بويىنا باس بوستاندىعىنان ايىرۋدى سۇرادى، دەپ حابارلايدى "ادىرنا" ءتىلشىسى.
28 جاستاعى شەرحان ايماحانعا قازاقستان رەسپۋبليكاسى قىلمىستىق كودەكسىنىڭ ءۇش بابى بويىنشا ايىپ تاعىلعان. پروكۋرور ماديار ابىلقاسىموۆ ءجارىسسوز بارىسىندا ءاربىر ەپيزود بويىنشا جازا تاعايىنداۋدى سۇرادى.
اتاپ ايتقاندا، قىلمىستىق كودەكستىڭ 99-بابى 2-بولىگىنىڭ 5-تارماعى، ياعني اسا قاتىگەزدىكپەن ادام ءولتىرۋ بويىنشا ءومىر بويىنا باس بوستاندىعىنان ايىرۋ جازاسى سۇرالدى. 125-1-باپتاعى نەكەگە تۇرۋعا ماجبۇرلەۋ بويىنشا ەكى جىلعا باس بوستاندىعىنان ايىرۋ، ال 115-1-باپتاعى ستالكينگ بويىنشا 200 ساعات قوعامدىق جۇمىس تاعايىنداۋ ۇسىنىلدى.
مەملەكەتتىك ايىپتاۋشى ءومىر بويىنا باس بوستاندىعىنان ايىرۋ جازاسىن توتەنشە قاۋىپسىزدىك مەكەمەسىندە وتەۋدى سۇرادى. سونداي-اق سوتتالۋشىعا قاتىستى قاماۋدا ۇستاۋ تۇرىندەگى بۇلتارتپاۋ شاراسىن وزگەرىسسىز قالدىرۋدى ءوتىندى. سوتتا شەرحان ايماحان تاعىلعان ايىپتاردىڭ ءبىر بولىگىن مويىندامايتىنىن ايتقان. ونىڭ سوزىنشە، نۇرايمەن قارىم-قاتىناستا بولعان جانە وعان ۇيلەنۋگە ۇسىنىس جاساعان. قايعىلى وقيعا بولعان كۇنى ول قىزبەن كەزدەسىپ، قارىم-قاتىناستى توقتاتپاق بولعانىن ايتتى.
سوتتالۋشىنىڭ نۇسقاسى بويىنشا، جانجال كەزىندە نۇراي وعان ءبىرىنشى بولىپ پىشاق قولدانعان. ايماحان سول ساتتە اففەكت جاعدايىندا بولعانىن جانە قىزعا ولىمگە اكەلگەن جاراقاتتاردى قالاي سالعانىن ەسىندە جوق ەكەنىن ايتقان. سونىمەن قاتار ول 2019 جىلى العان باس جاراقاتىنان كەيىن پسيحيكالىق اۋىتقۋى بولعانىن حابارلادى.
ءىس ماتەريالدارىنا سايكەس، تەرگەۋ بارىسىندا بۇعان دەيىن دە بىرقاتار ەپيزود انىقتالعان. 2025 جىلدىڭ كۇزىندە سوتتالۋشى نۇرايدى الماتىدا الىپ كەتىپ، نەكەگە تۇرۋعا ماجبۇرلەۋ ماقساتىندا تۇركىستان وبلىسىنداعى تۋىستارىنىڭ ۇيىنە اپارعانى ايتىلعان. كەيىن قىزدىڭ تۋىستارى پوليتسيانىڭ كومەگىمەن ونى ۇيىنە قايتارعان. ودان كەيىن ەر ادام نۇرايدى اڭدىپ، بىرنەشە كۇن ىشىندە وعان 154-تەن استام رەت قوڭىراۋ شالعانى جانە ونىڭ الماتىداعى ءۇيىنىڭ ماڭىندا جۇرگەنى تەرگەۋ ماتەريالدارىندا كورسەتىلگەن.
2026 جىلعى 11 قاڭتاردا شىمكەنتتە نۇراي سەرىكبايدىڭ اتا-اناسىنىڭ ءۇيى ماڭىندا وعان پىشاق جاراقاتتارى سالىنعان. قىز العان جاراقاتتارىنان وقيعا ورنىندا قازا تاپتى. كۇدىكتى ەكى كۇننەن كەيىن ۇستالعان.
